صنعاء/قاہرہ، یمن کے حوثی گروپ نے مصر کی دمیٹا بندرگاہ پر امریکی ملکیت اور زیرِ انتظام گیس ذخیرہ کرنے والے جہاز پر ہونے والے ڈرون حملے میں ملوث ہونے کی تردید کرتے ہوئے کہا ہے کہ اس واقعے سے متعلق گردش کرنے والی اطلاعات بے بنیاد ہیں۔
حوثیوں سے وابستہ خبر رساں ایجنسی سبا کے مطابق، گروپ کے دفترِ خارجہ کے ایک اہلکار نے بیان میں کہا کہ "یہ افواہیں بے بنیاد ہیں کہ یمن نے عرب جمہوریہ مصر کی دمیٹا بندرگاہ میں موجود کسی جہاز کو نشانہ بنایا۔”
بیان میں مزید کہا گیا کہ حوثیوں کا اس حملے سے کوئی تعلق نہیں اور ان پر عائد کیے جانے والے الزامات حقیقت پر مبنی نہیں ہیں۔
دوسری جانب مصری حکام نے بھی تاحال حملے کی ذمہ داری کسی گروپ یا ملک پر عائد نہیں کی۔ مصر کی حکومت کے مطابق واقعے کی تحقیقات جاری ہیں اور حملے کے ذمہ دار عناصر کا تعین کرنے کے لیے شواہد اکٹھے کیے جا رہے ہیں۔
یاد رہے کہ بدھ کے روز دمیٹا بندرگاہ پر ایک ڈرون حملے کے نتیجے میں امریکی ملکیت کے گیس ذخیرہ کرنے والے جہاز میں آگ لگ گئی تھی، جس کے بعد علاقائی سلامتی اور بحری تجارت سے متعلق خدشات میں اضافہ ہوا تھا۔
یہ واقعہ ایسے وقت میں پیش آیا ہے جب مشرقِ وسطیٰ میں جاری کشیدگی کے باعث بحیرہ احمر، نہر سویز اور دیگر اہم بحری راستوں کی سکیورٹی عالمی توجہ کا مرکز بنی ہوئی ہے۔
