پاکستانی مردوں کی قومی ہاکی ٹیم کے پرو ہاکی لیگ کیلئے انتخابی ٹرائلز کل سے شروع ہوں گے، جبکہ قومی اسکواڈ کے اعلان کی توقع بدھ کے روز کی جا رہی ہے۔
ذرائع کے مطابق بیرون ملک مختلف لیگز میں حصہ لینے والے تمام پاکستانی کھلاڑی قومی تربیتی کیمپ میں رپورٹ کر چکے ہیں۔ کیمپ میں شامل 35 کھلاڑی دو روزہ ٹرائلز میں شرکت کریں گے جہاں ان کی فٹنس، کارکردگی اور مہارت کا تفصیلی جائزہ لیا جائے گا۔
ٹرائلز کی نگرانی قومی ہاکی کے سابق اسٹار سمیع اللہ کی سربراہی میں قائم سلیکشن کمیٹی کرے گی۔ کمیٹی ٹرائلز مکمل ہونے کے بعد حتمی اسکواڈ کا انتخاب کرے گی۔
پاکستانی ٹیم کو پرو لیگ میں اہم اور سخت مقابلوں کا سامنا کرنا ہوگا جہاں قومی ٹیم بیلجم قومی ہاکہ ٹیم، اسپین ہاکی ٹیم، انگلینڈ ہاکی ٹیم اور روایتی حریف بھارتی ہاکی ٹیم کے خلاف دو، دو میچز کھیلے گی۔
قومی ہاکی ٹیم کی حالیہ کارکردگی کو بہتر بنانے کیلئے پاکستان ہاکی حکام نوجوان اور تجربہ کار کھلاڑیوں کے امتزاج پر مشتمل مضبوط اسکواڈ تشکیل دینے پر توجہ دے رہے ہیں۔ شائقین ہاکی کو امید ہے کہ قومی ٹیم پرو لیگ میں بہتر کارکردگی دکھا کر عالمی سطح پر پاکستان ہاکی کا مقام دوبارہ مستحکم کرے گی۔
