پاکستان کرکٹ بورڈ کے زیر اہتمام قذافی اسٹیڈیم لاہور میں چار روزہ پی سی بی لیول ٹو امپائرنگ کورس 14 سے 17 مئی تک قذافی اسٹیڈیم میں منعقد ہوا، جس میں ملک بھر سے 65 امیدواروں نے شرکت کی۔
پی سی بی ترجمان کے مطابق تمام امیدوار پہلے ہی لیول ون کورس مکمل کر چکے تھے اور اسی بنیاد پر انہیں لیول ٹو پروگرام کے لیے کوالیفائی کیا گیا تھا۔ کورس کے دوران امیدواروں کیلئے خصوصی ٹریننگ سیشنز، تحریری امتحانات اور انٹرویوز کا انعقاد کیا گیا تاکہ ان کی تکنیکی صلاحیتوں اور عملی مہارت کا جائزہ لیا جا سکے۔
کورس کا بنیادی مقصد باصلاحیت اور معیاری امپائرز کو تیار کرنا اور انہیں مستقبل میں پی سی بی امپائرز پینل کا حصہ بنانا تھا۔
کورس میں تربیتی ذمہ داریاں احسن رضا اور آصف یعقوب نے انجام دیں۔ احسن رضا آئی سی سی ایلیٹ پینل جبکہ آصف یعقوب آئی سی سی ایمرجنگ پینل سے وابستہ ہیں۔
احسن رضا نے کورس کے اختتام پر گفتگو کرتے ہوئے کہا کہ پروگرام کے دوران کئی باصلاحیت امیدوار سامنے آئے جن کی کرکٹ قوانین سے آگاہی، کمیونیکیشن اسکلز اور مجموعی شخصیت متاثر کن رہی۔ انہوں نے کہا کہ وہ پی سی بی اور امپائرز ڈیپارٹمنٹ کے شکر گزار ہیں جنہوں نے اس اہم تربیتی پروگرام کے انعقاد کو ممکن بنایا۔
انہوں نے مزید کہا کہ کورس کے دوران کمیونیکیشن، عملی امپائرنگ اور تھیوری پر خصوصی توجہ دی گئی تاکہ مستقبل میں بین الاقوامی معیار کے امپائرز تیار کیے جا سکیں اور پاکستان کرکٹ میں امپائرنگ کے معیار کو مزید بہتر بنایا جا سکے۔
