ایشین فائیو اے سائیڈ ہاکی ٹورنامنٹ میں پاکستان اور بھارت کے درمیان کھیلے گئے گروپ میچ کے دوران پاکستانی ٹیم کی مینجمنٹ سے ایک سنگین انتظامی غلطی سامنے آئی، جس کا خمیازہ قومی ٹیم کو شکست کی صورت میں بھگتنا پڑا۔
میچ کے دوران پاکستان نے مقررہ پانچ کھلاڑیوں کے بجائے چھ کھلاڑی میدان میں اتار دیے۔ امپائر نے اضافی کھلاڑی کی نشاندہی کرتے ہوئے کارروائی کی، جس کے نتیجے میں پاکستان کے دو کھلاڑیوں کو عارضی طور پر میدان سے باہر بھیج دیا گیا۔
اس فیصلے کے بعد پاکستانی ٹیم کو کچھ وقت کے لیے صرف تین کھلاڑیوں کے ساتھ کھیلنا پڑا، جس کا بھرپور فائدہ بھارتی ٹیم نے اٹھایا اور گروپ مرحلے کے اس اہم مقابلے میں کامیابی حاصل کر لی۔
رپورٹس کے مطابق یہ شکست کسی تکنیکی یا کھیل کے معیار سے زیادہ پاکستانی ٹیم مینجمنٹ کی انتظامی غفلت کا نتیجہ قرار دی جا رہی ہے، جس پر ہاکی حلقوں میں تشویش کا اظہار کیا جا رہا ہے۔
دوسری جانب ٹورنامنٹ کا فائنل آج پاکستان اور بھارت کے درمیان کھیلا جائے گا، جہاں قومی ٹیم کے پاس اپنے روایتی حریف کے خلاف بہتر کارکردگی دکھانے کا موقع ہوگا۔
واضح رہے کہ فائیو اے سائیڈ ہاکی کے قوانین کے مطابق ہر ٹیم ایک وقت میں صرف پانچ کھلاڑی میدان میں اتار سکتی ہے، جبکہ مقررہ تعداد سے زیادہ کھلاڑی میدان میں آنے کی صورت میں امپائر قوانین کے مطابق کارروائی کرتے ہیں۔
