مصری فٹبال ٹیم نے فیفا ورلڈ کپ کے ناک آؤٹ مرحلے میں آسٹریلیا کو سنسنی خیز مقابلے کے بعد پنالٹی شوٹ آؤٹ میں 4-2 سے شکست دے کر اپنی تاریخ کی پہلی ناک آؤٹ مرحلے کی کامیابی حاصل کر لی۔
مقررہ 90 منٹ اور اضافی وقت کے اختتام تک دونوں ٹیموں کے درمیان مقابلہ 1-1 سے برابر رہا، جس کے بعد میچ کا فیصلہ پنالٹی شوٹ آؤٹ پر ہوا، جہاں مصر کے کھلاڑیوں نے شاندار اعصاب کا مظاہرہ کرتے ہوئے فتح اپنے نام کر لی۔
میچ کے بعد مصری قومی ٹیم کے ہیڈ کوچ حسام حسن نے کامیابی کو مصری اور فلسطینی عوام کے نام کرتے ہوئے کہا کہ وہ اس تاریخی فتح کو فلسطین کے عوام کے ساتھ اظہارِ یکجہتی کے طور پر پیش کرتے ہیں۔
انہوں نے کہا "میں یہ فتح مصری اور فلسطینی عوام کے نام کرتا ہوں۔ اللہ فلسطینی عوام کو کامیابی عطا فرمائے اور شہداء پر اپنی رحمت نازل کرے۔”
میچ کے اختتام پر حسام حسن میدان میں مصر اور فلسطین کے پرچم بھی ساتھ لے کر آئے، جسے شائقین نے بھرپور انداز میں سراہا۔
دوسری جانب غزہ میں بھی شہریوں نے جنگ سے متاثرہ علاقوں، تباہ شدہ عمارتوں اور عارضی خیموں میں بڑی اسکرینوں پر میچ دیکھا۔ مصر کی کامیابی کے بعد فلسطینی شہریوں نے خوشی کا اظہار کیا اور مختلف مقامات پر جشن منایا۔
سوشل میڈیا پر وائرل ہونے والی ویڈیوز میں بچوں اور نوجوانوں کو مصر کے پرچم اپنے چہروں پر بنائے جشن مناتے دیکھا گیا، جبکہ متعدد صارفین نے حسام حسن کے فلسطین کے حق میں دیے گئے بیان کو بھی سراہا۔
اس تاریخی کامیابی کے ساتھ مصر نے پہلی مرتبہ ورلڈ کپ کے ناک آؤٹ مرحلے میں فتح حاصل کرتے ہوئے پری کوارٹر فائنل میں جگہ بنا لی ہے، جہاں اس کا مقابلہ ارجنٹینا یا کیپ ورڈی میں سے کسی ایک ٹیم سے ہوگا۔
