جارجیا: امریکی صدر ڈونلڈ ٹرمپ نے ایک بار پھر دعویٰ کیا ہے کہ ایران امریکا کے ساتھ معاہدہ کرنا چاہتا ہے، تاہم ان کے بقول تہران ابھی کسی حتمی معاہدے کے لیے تیار نہیں اور جلد اس مرحلے پر پہنچ جائے گا۔
ریاست جارجیا میں ایک عوامی ریلی سے خطاب کرتے ہوئے ڈونلڈ ٹرمپ نے کہا کہ امریکا فی الحال ایران کے ساتھ معاہدہ کرنے میں دلچسپی نہیں رکھتا، جبکہ ایران مسلسل معاہدے کی خواہش ظاہر کر رہا ہے۔
ٹرمپ نے کہا، "وہ شدید دباؤ میں ہیں اور معاہدہ کرنا چاہتے ہیں، لیکن جب بھی وہ کوئی معاہدہ کرتے ہیں تو اس کی شرائط تبدیل کرنے کی کوشش کرتے ہیں، اسی لیے وہ ابھی تیار نہیں ہیں۔ تاہم وہ بہت جلد معاہدے کے لیے تیار ہو جائیں گے۔”
امریکی صدر نے یہ دعویٰ بھی کیا کہ امریکا آبنائے ہرمز کے قریب ایرانی اثاثوں کو نشانہ بنا رہا ہے تاکہ ایران کو جوہری ہتھیار حاصل کرنے سے روکا جا سکے۔
انہوں نے کہا، "اگر امریکا اور وینزویلا کی تیل کی پیداوار کو یکجا کیا جائے تو ہمارے پاس عالمی تیل مارکیٹ کا تقریباً 62 فیصد حصہ ہوگا، اس لیے ہمیں آبنائے ہرمز کی ضرورت نہیں۔ تاہم ہم وہاں موجود ہیں کیونکہ ہم ایران کو جوہری ہتھیار حاصل نہیں کرنے دے سکتے۔”
ٹرمپ نے اپنی تقریر میں یہ واضح نہیں کیا کہ آبنائے ہرمز کے قریب ممکنہ فوجی کارروائیوں کا ایران کے جوہری پروگرام سے براہِ راست کیا تعلق ہے۔
امریکا اور ایران کے درمیان حالیہ ہفتوں میں کشیدگی میں اضافہ دیکھنے میں آیا ہے، جبکہ دونوں ممالک کی جانب سے ایک دوسرے کے خلاف سخت بیانات اور ممکنہ فوجی اقدامات کے اشارے بھی سامنے آ رہے ہیں۔
