نیو جرسی: فیفا ورلڈ کپ 2026 کے سنسنی خیز فائنل میں اسپین نے دفاعی چیمپئن ارجنٹینا کو اضافی وقت میں 1-0 سے شکست دے دوسری مرتبہ فٹبال کا عالمی تاج اپنے سر سجا لیا۔
امریکا کے شہر نیو جرسی میں کھیلے گئے فائنل کو دنیا بھر میں کروڑوں شائقین نے دیکھا، جہاں دونوں ٹیموں نے مقررہ 90 منٹ تک شاندار دفاعی کھیل پیش کیا، تاہم کوئی بھی ٹیم گول کرنے میں کامیاب نہ ہو سکی اور مقابلہ اضافی وقت میں داخل ہوگیا۔
اضافی وقت کے پہلے 15 منٹ بھی بغیر کسی گول کے اختتام پذیر ہوئے، لیکن دوسرے اضافی ہاف میں اسپین کے فیرن ٹوریس نے شاندار گول کر کے اپنی ٹیم کو فیصلہ کن برتری دلا دی، جو میچ کے اختتام تک برقرار رہی۔
اس فتح کے ساتھ اسپین نے 2010 کے بعد پہلی بار فیفا ورلڈ کپ جیتا اور مجموعی طور پر دوسرا عالمی ٹائٹل اپنے نام کیا۔
دوسری جانب ارجنٹینا مسلسل دوسری مرتبہ عالمی چیمپئن بننے کا خواب پورا نہ کر سکا۔ ارجنٹائن کی ٹیم اس سے قبل 1978، 1986 اور 2022 میں ورلڈ کپ جیت چکی ہے، جبکہ یہ اس کی مجموعی طور پر ساتویں ورلڈ کپ فائنل میں شرکت تھی۔
اس فائنل کو ارجنٹینا کے کپتان لیونل میسی کے ممکنہ آخری ورلڈ کپ میچ کے طور پر بھی غیر معمولی اہمیت حاصل تھی۔ شائقین کو امید تھی کہ میسی اپنی ٹیم کو ایک اور عالمی اعزاز دلائیں گے، تاہم اسپین کی مضبوط دفاعی حکمت عملی اور فیرن ٹوریس کے فیصلہ کن گول نے ارجنٹینا کی تمام امیدوں پر پانی پھیر دیا۔
میچ سے قبل فٹبال شائقین کی نظریں لیونل میسی اور اسپین کے نوجوان اسٹار لامین یامال پر مرکوز تھیں، تاہم فیصلہ کن لمحے میں فیرن ٹوریس ہیرو بن کر سامنے آئے اور اسپین کو تاریخ ساز فتح دلا دی۔
اس کامیابی کے بعد اسپین آئندہ چار برس کے لیے عالمی فٹبال کا نیا چیمپئن بن گیا، جبکہ ارجنٹینا کو اپنے اعزاز کا دفاع کرنے میں ناکامی کا سامنا کرنا پڑا۔
