اسلام آباد: پاکستان نے اسکاٹ لینڈ کے شہر گلاسگو میں ہونے والے کامن ویلتھ گیمز 2026 کے لیے 36 کھلاڑیوں اور میچ آفیشلز پر مشتمل قومی دستے کا اعلان کر دیا ہے۔ دستے کی قیادت چیف ڈی مشن کی حیثیت سے میجر عادل رحمانی کریں گے۔
قومی دستے میں جیولن تھرو کے اولمپک اور عالمی شہرت یافتہ ایتھلیٹ ارشد ندیم سمیت متعدد نمایاں کھلاڑی شامل ہیں۔ دیگر نمایاں ایتھلیٹس میں فائقہ ریاض، انصر عباس، محمد اختر، محمد اسماعیل، محمد یاسر اور نورین حسین شامل ہیں۔
پاکستانی کھلاڑی میگا ایونٹ میں باکسنگ، ایتھلیٹکس، سوئمنگ، جمناسٹکس، جوڈو اور لان بال کے مقابلوں میں اپنی صلاحیتوں کا مظاہرہ کریں گے۔
باکسنگ ٹیم میں افضل خان، فاطمہ زہرا، ملائیکہ زاہد، قدرت اللہ اور ثمامہ رحمان شامل ہیں، جبکہ جمناسٹکس میں شہزاد علی پاکستان کی نمائندگی کریں گے۔
جوڈو میں شاہ حسین ایکشن میں نظر آئیں گے، جبکہ لان بال کے مقابلوں میں مقصود، وسیم خان اور محمد ایوب قریشی پاکستان کی نمائندگی کریں گے۔
سوئمنگ کے ایونٹس میں حمزہ آصف، حریم ملک، جہاں آراء نبی اور محمد احمد درانی حصہ لیں گے اور ملک کے لیے بہترین نتائج حاصل کرنے کی کوشش کریں گے۔
کامن ویلتھ گیمز 2026 کا انعقاد 23 جولائی سے 2 اگست تک اسکاٹ لینڈ کے شہر گلاسگو میں ہوگا، جہاں دولتِ مشترکہ کے مختلف ممالک کے ہزاروں کھلاڑی مختلف کھیلوں میں مد مقابل ہوں گے۔ پاکستانی شائقین کی نظریں خصوصاً ارشد ندیم سمیت قومی ایتھلیٹس کی کارکردگی پر مرکوز ہوں گی، جن سے تمغوں کی امید کی جا رہی ہے۔
