فیفا ورلڈ کپ 2026 کے پہلے سیمی فائنل میں اسپین نے شاندار کھیل کا مظاہرہ کرتے ہوئے فرانس کو 0-2 سے شکست دے کر 16 برس بعد ورلڈ کپ کے فائنل میں جگہ بنا لی۔
اسپین نے میچ کا آغاز انتہائی جارحانہ انداز میں کیا اور پہلے ہاف میں ہی برتری حاصل کر لی۔ اسپین کی جانب سے میکیل اویارزابال نے 22ویں منٹ میں پنالٹی کک پر گول اسکور کیا، جو رواں ورلڈ کپ میں ان کا پانچواں گول بھی ہے۔
دوسرے ہاف میں بھی اسپین نے اپنی برتری برقرار رکھی اور 58ویں منٹ میں پیڈرو پورو نے شاندار شاٹ کے ذریعے دوسرا گول کرکے اپنی ٹیم کی فتح یقینی بنا دی۔
دوسری جانب ٹورنامنٹ میں آٹھ گول کرنے والے فرانس کے اسٹار فارورڈ کائلیان ایمباپے اس اہم سیمی فائنل میں کئی مواقع ملنے کے باوجود کوئی گول کرنے میں کامیاب نہ ہو سکے، جس کے باعث فرانس کی ٹیم میچ میں واپسی نہ کر سکی۔
اس فتح کے ساتھ اسپین نے 16 سال بعد فیفا ورلڈ کپ کے فائنل میں رسائی حاصل کر لی، جبکہ فرانس 2018 اور 2022 کے بعد مسلسل تیسری مرتبہ فائنل کھیلنے کا خواب پورا نہ کر سکا۔
فیفا ورلڈ کپ 2026 کے فائنل میں اسپین کا مقابلہ دوسرے سیمی فائنل کی فاتح ٹیم، ارجنٹینا یا انگلینڈ سے ہوگا۔ دونوں ٹیموں کے درمیان دوسرا سیمی فائنل بدھ اور جمعرات کی درمیانی شب کھیلا جائے گا، جس کے بعد فیصلہ ہوگا کہ اسپین کے مدمقابل کون سی ٹیم ہوگی۔
