تیجوانا: ایرانی فٹبال ٹیم فیفا ورلڈ کپ 2026 کی تیاریوں کے سلسلے میں میکسیکو پہنچ گئی ہے، جہاں ٹیم امریکا میں اپنے گروپ میچوں سے قبل تربیتی کیمپ لگائے گی۔
رپورٹس کے مطابق ایرانی اسکواڈ ہفتہ کی صبح میکسیکو کے سرحدی شہر Tijuana پہنچا۔ ٹیم کے سینئر کھلاڑی Ehsan Hajsafi جہاز سے باہر آنے والے پہلے کھلاڑی تھے، جنہوں نے دیگر ساتھیوں کی قیادت کرتے ہوئے سیکیورٹی اور امیگریشن مراحل مکمل کیے۔
ایرانی ٹیم کی آمد پر ہوائی اڈے کے باہر موجود شائقین نے قومی پرچم لہرا کر اپنے پسندیدہ کھلاڑیوں کا استقبال کیا۔ بعد ازاں ٹیم خصوصی بس کے ذریعے اپنے تربیتی مرکز روانہ ہوگئی۔
میڈیا رپورٹس کے مطابق ایران کی ورلڈ کپ تیاریوں پر خطے کی موجودہ کشیدگی اور سفری پیچیدگیوں کے اثرات مرتب ہوئے ہیں۔ ویزا پروسیسنگ کے مسائل کے باعث ایران کو اپنا مجوزہ تربیتی مرکز Tucson سے منتقل کر کے تیجوانا میں قائم کرنا پڑا۔
ایرانی ٹیم گزشتہ دنوں Antalya میں تربیتی کیمپ لگائے ہوئے تھی اور وہاں سے براہِ راست میکسیکو پہنچی ہے۔ توقع ہے کہ ٹیم تیجوانا میں تیاریوں کو حتمی شکل دینے کے بعد امریکا میں اپنے گروپ مرحلے کے میچوں کے لیے روانہ ہوگی۔
ورلڈ کپ 2026 کے دوران ایران اپنے تین گروپ میچ امریکا میں کھیلے گا، جبکہ ٹیم انتظامیہ کو سفری اور لاجسٹک امور کے حوالے سے خصوصی انتظامات کرنا پڑ رہے ہیں۔
