ناگویا: ایشین گیمز 2026 کے مردوں اور خواتین کے کرکٹ مقابلوں کے لیے ڈراز اور گروپس کا باضابطہ اعلان کر دیا گیا، جس کے تحت پاکستان، بھارت، بنگلادیش اور سری لنکا نے مردوں کے ایونٹ میں عالمی رینکنگ کی بنیاد پر براہِ راست ناک آؤٹ مرحلے کے لیے کوالیفائی کر لیا ہے۔
مردوں کے ٹی ٹوئنٹی ایونٹ میں ابتدائی مرحلے میں چھ ٹیمیں دو گروپس میں تقسیم کی گئی ہیں۔ گروپ اے میں افغانستان، جاپان اور نیپال شامل ہیں، جبکہ گروپ بی میں ہانگ کانگ، ملائیشیا اور عمان کو رکھا گیا ہے۔
دونوں گروپس سے ٹاپ دو ٹیمیں ناک آؤٹ مرحلے میں پہنچیں گی، جہاں ان کا مقابلہ پاکستان، بھارت، بنگلادیش اور سری لنکا سے ہوگا، جو پہلے ہی کوارٹر فائنل مرحلے کے لیے کوالیفائی کر چکے ہیں۔
مردوں کے کرکٹ مقابلے 24 ستمبر سے یکم اکتوبر 2026 تک جاپان کے شہر ناگویا میں ٹی ٹوئنٹی فارمیٹ میں کھیلے جائیں گے۔
دوسری جانب خواتین کے کرکٹ ایونٹ کا آغاز 17 ستمبر سے ہوگا۔ کوارٹر فائنل مرحلے میں بھارت کا مقابلہ جاپان، بنگلادیش کا چین، سری لنکا کا ملائیشیا جبکہ پاکستان کا سامنا تھائی لینڈ سے ہوگا۔
خواتین کے تمام مقابلے 22 ستمبر تک مکمل ہوں گے۔
واضح رہے کہ 2023 کے ایشین گیمز میں بھارت نے مردوں اور خواتین دونوں کرکٹ ایونٹس میں سونے کے تمغے اپنے نام کیے تھے، جبکہ 2026 میں بھی سخت مقابلے کی توقع کی جا رہی ہے۔
