لندن: برطانیہ نے امریکی صدر ڈونلڈ ٹرمپ کی جانب سے آبنائے ہرمز سے گزرنے والے تجارتی جہازوں پر 20 فیصد سیکیورٹی فیس یا ٹول ٹیکس عائد کرنے کی تجویز کو مسترد کرتے ہوئے کہا ہے کہ اس اہم بین الاقوامی آبی گزرگاہ پر کسی قسم کے ٹول یا اضافی چارجز نہیں لگائے جانے چاہئیں۔
امریکی میڈیا رپورٹس کے مطابق برطانوی حکومت نے واضح کیا ہے کہ واشنگٹن کو اپنی مجوزہ پالیسی کی مکمل تفصیلات عالمی برادری کے سامنے رکھنی چاہئیں۔ برطانوی حکومت کے ترجمان کا کہنا تھا کہ برطانیہ کا مؤقف ہمیشہ یہی رہا ہے کہ آبنائے ہرمز کو بین الاقوامی قانون کے مطابق تمام ممالک کے لیے کھلا رکھا جائے اور عالمی بحری تجارت میں کسی قسم کی رکاوٹ پیدا نہ ہونے دی جائے۔
ترجمان نے خبردار کیا کہ آبنائے ہرمز پر ٹول ٹیکس یا اضافی فیس کا نفاذ عالمی تجارت، توانائی کی سپلائی اور بین الاقوامی شپنگ پر منفی اثرات مرتب کر سکتا ہے، اس لیے اس نوعیت کے اقدامات سے گریز کیا جانا چاہیے۔
رپورٹس کے مطابق انٹرنیشنل میری ٹائم آرگنائزیشن (IMO) نے بھی آبنائے ہرمز کو ٹول فری رکھنے پر زور دیا ہے اور کہا ہے کہ بین الاقوامی بحری راستوں پر آزادانہ اور محفوظ آمدورفت عالمی تجارت کے لیے ناگزیر ہے۔
واضح رہے کہ امریکی صدر ڈونلڈ ٹرمپ نے حال ہی میں اعلان کیا تھا کہ ایرانی بحری جہازوں پر پابندی عائد کی جائے گی جبکہ دیگر ممالک کے تجارتی کارگو جہازوں سے آبنائے ہرمز سے گزرنے کے عوض 20 فیصد سیکیورٹی فیس وصول کی جائے گی۔ ٹرمپ کا کہنا تھا کہ امریکا آبنائے ہرمز کی سلامتی کو یقینی بنائے گا اور اس مقصد کے لیے اسے مناسب معاوضہ ملنا چاہیے۔
برطانیہ کے حالیہ مؤقف کو اس امریکی تجویز پر عالمی سطح پر سامنے آنے والے اہم ردعمل کے طور پر دیکھا جا رہا ہے، جبکہ آبنائے ہرمز کی صورتحال بدستور عالمی سفارتی اور اقتصادی توجہ کا مرکز بنی ہوئی ہے۔
