کراچی: پاکستان اور جنوبی افریقہ کی ویمنز انڈر 19 کرکٹ ٹیموں کے درمیان پانچ ٹی20 میچوں پر مشتمل سیریز کا آغاز کل کراچی میں ہوگا، جہاں دونوں ٹیمیں پہلے میچ میں مدمقابل ہوں گی۔
سیریز کے آغاز سے قبل ٹرافی کی باقاعدہ رونمائی کی تقریب منعقد ہوئی، جس میں پاکستان ویمنز انڈر 19 ٹیم کی کپتان فضا فیاض اور جنوبی افریقہ ویمنز انڈر 19 ٹیم کی کپتان میکا فین فارسٹ نے مشترکہ طور پر ٹرافی کی رونمائی کی۔
اس موقع پر پاکستانی کپتان فضا فیاض نے کہا کہ نوجوان کھلاڑیوں کے لیے یہ سیریز انتہائی اہمیت کی حامل ہے اور پوری ٹیم پُرعزم ہے کہ شاندار کارکردگی کا مظاہرہ کرتے ہوئے مثبت نتائج حاصل کرے گی۔
دوسری جانب جنوبی افریقہ کی کپتان میکا فین فارسٹ نے پاکستان میں کھیلنے پر خوشی کا اظہار کرتے ہوئے کہا کہ انہیں یہاں آکر سیریز کھیلنے کا بے حد انتظار تھا۔ انہوں نے کہا کہ اگر موقع ملا تو وہ پاکستان کے اسٹار کرکٹر بابر اعظم اور فاسٹ بولر شاہین شاہ آفریدی سے ضرور ملاقات کرنا چاہیں گی۔
پاکستان اور جنوبی افریقہ کی ویمنز انڈر 19 ٹیموں کے درمیان پانچ میچوں پر مشتمل یہ ٹی20 سیریز نوجوان کھلاڑیوں کو بین الاقوامی سطح پر اپنی صلاحیتوں کے اظہار کا اہم موقع فراہم کرے گی۔
