مسلم ورلڈ لیگ کے سیکرٹری جنرل ڈاکٹر محمد العیسیٰ کو پاکستان کی طرف سے نشانِ خدمت اور اعزازی ڈاکٹریٹ دینے کی منظوری

رپورٹ: سید فرزند علی

پاکستانی صدر آصف علی زرداری نے مسلم ورلڈ لیگ (رابطہ عالم اسلامی) کے سیکرٹری جنرل ڈاکٹر محمد بن عبدالکریم العیسیٰ کو عالم اسلام کے لیے ان کی نمایاں خدمات کے اعتراف میں نشانِ خدمت دینے کی منظوری دے دی ہے۔

سرکاری ذرائع کے مطابق یہ اعزاز بین المذاہب ہم آہنگی، اسلامی تعاون، اعتدال پسند فکر کے فروغ اور مسلم دنیا کے لیے ڈاکٹر محمد العیسیٰ کی خدمات کے اعتراف میں دیا جا رہا ہے۔

صدر مملکت نے اس کے ساتھ نیشنل یونیورسٹی آف ماڈرن لینگویجز (نمل) کی جانب سے ڈاکٹر محمد بن عبدالکریم العیسیٰ کو اسلامیات اور بین الاقوامی تعلقات کے شعبوں میں اعزازی ڈاکٹریٹ عطا کرنے کی بھی منظوری دی ہے۔

ڈاکٹر محمد بن عبدالکریم العیسیٰ سعودی عرب کے ممتاز عالم دین، قانون دان اور بین الاقوامی اسلامی شخصیت ہیں۔ وہ مئی 2016 سے رابطہ عالم اسلامی (مسلم ورلڈ لیگ) کے سیکرٹری جنرل کی ذمہ داریاں انجام دے رہے ہیں۔

اس سے قبل وہ سعودی عرب کے وزیرِ انصاف بھی رہ چکے ہیں، جبکہ بعد ازاں انہیں شاہی دیوان میں وزیر کے درجے کے مشیر کے طور پر بھی تعینات کیا گیا۔ شعبان 1436 ہجری میں انہیں ڈاکٹر عبداللہ بن محسن الترکی کی جگہ رابطہ عالم اسلامی کا سیکرٹری جنرل مقرر کیا گیا۔

ڈاکٹر العیسیٰ کو 1443 ہجری میں مسجد نمرہ، مکہ مکرمہ میں خطبۂ حج (خطبۂ عرفہ) دینے کا اعزاز بھی حاصل ہوا، جس کے بعد وہ سعودی دور کے تیرہویں خطیبِ عرفہ بنے۔