بیجنگ: شمالی کوریا کے وزیراعظم پاک تھاے سونگ تین روزہ سرکاری دورے پر جمعہ کے روز چین کے دارالحکومت بیجنگ پہنچ گئے، جہاں وہ اعلیٰ سطحی ملاقاتوں اور دوطرفہ تقریبات میں شرکت کریں گے۔
چینی خبر رساں ادارے شنہوا کے مطابق پاک تھاے سونگ، جو ورکرز پارٹی آف کوریا کی مرکزی کمیٹی کے پولیٹیکل بیورو کی پریزیڈیم کے رکن اور ریاستی امور کمیشن کے نائب صدر بھی ہیں، کمیونسٹ پارٹی آف چائنا (CPC) کی مرکزی کمیٹی اور چینی حکومت کی دعوت پر جمعہ سے اتوار تک چین کا سرکاری دورہ کر رہے ہیں۔
دورے کے دوران شمالی کوریا کے وزیراعظم چین اور شمالی کوریا کے درمیان دوستی، تعاون اور باہمی امداد کے معاہدے کی 65ویں سالگرہ کے موقع پر منعقد ہونے والی یادگاری تقریب میں بھی شرکت کریں گے۔
توقع ہے کہ اس دورے کے دوران دونوں ممالک کے رہنما دوطرفہ تعلقات، اقتصادی تعاون، علاقائی صورتحال اور باہمی دلچسپی کے دیگر امور پر بھی تبادلۂ خیال کریں گے۔
تجزیہ کاروں کے مطابق یہ دورہ ایسے وقت میں ہو رہا ہے جب بیجنگ اور پیانگ یانگ اپنے تاریخی تعلقات کو مزید مضبوط بنانے اور مختلف شعبوں میں تعاون کو فروغ دینے کی کوششیں جاری رکھے ہوئے ہیں۔
