تہران: ایرانی پاسداران انقلاب (IRGC) کی بحری فورس نے کہا ہے کہ آج صبح صوبہ خوزستان پر ہونے والے امریکی فضائی حملوں میں پاسداران انقلاب کے 3 اہلکار شہید ہوگئے ہیں۔
عرب میڈیا کے مطابق ایرانی پاسداران انقلاب کی بحری فورس نے اپنے بیان میں کہا ہے کہ آبنائے ہرمز میں کسی بھی امریکی فوجی مہم جوئی یا جہاز رانی میں مداخلت کا فیصلہ کن اور مؤثر جواب دیا جائے گا۔
بیان میں مزید کہا گیا کہ غیر ملکی طاقتوں کا آبنائے ہرمز میں کوئی مفاد نہیں ہے، جبکہ امریکا کی فوجی مہم جوئی اس اہم بحری گزرگاہ کے دوبارہ کھلنے میں سب سے بڑی رکاوٹ بنے گی۔
پاسداران انقلاب کی بحری فورس کا کہنا تھا کہ ایران اپنی سمندری حدود، قومی سلامتی اور علاقائی خودمختاری کے تحفظ کے لیے ہر ضروری اقدام اٹھانے کا حق محفوظ رکھتا ہے۔
یہ بیان ایسے وقت میں سامنے آیا ہے جب امریکی صدر ڈونلڈ ٹرمپ نے ایران کے ساتھ مفاہمتی یادداشت کے خاتمے کا اعلان کیا، جس کے بعد دونوں ممالک کے درمیان کشیدگی میں مزید اضافہ دیکھنے میں آیا ہے۔
دوسری جانب ایران اور امریکا نے ایک دوسرے کے فوجی اہداف کو کامیابی سے نشانہ بنانے کے دعوے بھی کیے ہیں، تاہم ان دعوؤں کی آزاد ذرائع سے مکمل تصدیق نہیں ہو سکی۔
علاوہ ازیں ایرانی میڈیا نے جنوبی صوبے بوشہر میں متعدد دھماکوں کی آوازیں سنائی دینے کی بھی اطلاع دی ہے، تاہم ان دھماکوں کی نوعیت اور ممکنہ نقصانات کے بارے میں حکام کی جانب سے مزید تفصیلات جاری نہیں کی گئیں۔
