تہران: ایران کے صوبہ گلستان میں چین-ایران ریلوے کوریڈور کا ایک اہم ریلوے پل مبینہ امریکی حملے میں نشانہ بننے کے بعد خطے میں کشیدگی مزید بڑھ گئی ہے۔ ایرانی میڈیا کے مطابق گزشتہ شب عق تاقہ خان ریلوے پل پر حملہ کیا گیا، جس کے نتیجے میں ریلوے انفراسٹرکچر کو نقصان پہنچا اور ٹرین آپریشن متاثر ہوا۔
ایرانی خبر رساں ایجنسی کے مطابق مذکورہ ریلوے راستہ ترکمانستان اور قازقستان کے ذریعے ایران کو چین سے ملاتا ہے، جبکہ روس بھی 2025ء کے آخر سے اسی کوریڈور کو ایران کے لیے کارگو ترسیل کے لیے استعمال کر رہا تھا۔ اس روٹ کو خطے کی تجارت اور بین الاقوامی نقل و حمل کے لیے نہایت اہم قرار دیا جاتا ہے۔
حملے کے بعد ریلوے لائن کے بعض حصوں کو نقصان پہنچنے کے باعث تہران سے مشہد جانے والی ٹرین سروس عارضی طور پر معطل کر دی گئی ہے۔ ایرانی محکمۂ ریلوے کا کہنا ہے کہ تکنیکی ماہرین اور امدادی ٹیمیں فوری طور پر متاثرہ مقام پر پہنچ گئی ہیں اور بحالی کا کام جاری ہے، جبکہ مسافروں کی سہولت کے لیے متبادل بس سروس کا انتظام بھی کیا جا رہا ہے۔
ایرانی حکام نے امید ظاہر کی ہے کہ ریلوے پل کی مرمت جلد مکمل کر لی جائے گی تاکہ ریلوے ٹریفک معمول کے مطابق بحال ہو سکے۔
دوسری جانب ایران نے جنوبی علاقوں پر امریکی حملوں اور ملک کے مشرقی حصے میں دو ریلوے پلوں کو نشانہ بنانے کی شدید مذمت کرتے ہوئے انہیں جنگی جرم قرار دیا ہے۔
ایرانی وزارتِ خارجہ نے اپنے بیان میں کہا کہ امریکی حملے اقوامِ متحدہ کے منشور اور مفاہمتی یادداشت کے آرٹیکل 1 اور 5 کی کھلی خلاف ورزی ہیں۔ وزارتِ خارجہ کے مطابق یہ کارروائیاں مفاہمتی یادداشت پر عمل درآمد میں مسلسل ناکامی کو جواز فراہم کرنے کی کوشش ہیں۔
بیان میں مزید کہا گیا کہ ایران امریکا کو معاہدوں کی خلاف ورزی، طاقت کے استعمال اور ایرانی قومی مفادات کو نقصان پہنچانے کی اجازت نہیں دے گا۔ وزارتِ خارجہ نے اس عزم کا اعادہ کیا کہ ملک اپنی قومی خودمختاری اور دفاع کے تحفظ کے لیے ہر ممکن اقدام کرے گا اور جارحیت کے ذمہ دار عناصر کو جوابدہ بنایا جائے گا۔
ادھر ایرانی وزارتِ خارجہ کے ترجمان اسماعیل بقائی نے نیٹو کے سیکریٹری جنرل مارک روٹے کے حالیہ بیانات پر ردعمل دیتے ہوئے کہا کہ یہ بیانات یورپی ممالک کی امریکا اور اسرائیل کے ساتھ ایران کے خلاف جنگ میں دانستہ شمولیت کا اعتراف ہیں۔ ان کا کہنا تھا کہ ایسے بیانات خطے میں کشیدگی بڑھانے اور تنازع کو مزید وسعت دینے کا سبب بن سکتے ہیں۔
