لاہور: پاکستان تحریک انصاف (پی ٹی آئی) کے مرکزی صدر اور سابق وزیراعلیٰ پنجاب چودھری پرویز الٰہی نے پاک فضائیہ کے گروپ کیپٹن عاصم طارق شہید کے اہل خانہ سے ٹیلیفون پر رابطہ کرکے دلی تعزیت اور ہمدردی کا اظہار کیا۔
چودھری پرویز الٰہی نے شہید افسر کی خدمات اور قربانی کو خراجِ عقیدت پیش کرتے ہوئے کہا کہ گروپ کیپٹن عاصم طارق نے انسانیت کے تحفظ اور وطن کے دفاع کے لیے اپنی جان کا نذرانہ پیش کیا، جسے ہمیشہ یاد رکھا جائے گا۔
انہوں نے مطالبہ کیا کہ گروپ کیپٹن عاصم طارق شہید کے قتل میں ملوث عناصر کو جلد از جلد قانون کے مطابق کیفرِ کردار تک پہنچایا جائے تاکہ انصاف کے تقاضے پورے ہو سکیں۔
سابق وزیراعلیٰ پنجاب نے کہا کہ شہید افسر کی غیر معمولی جرات، بہادری اور پیشہ ورانہ خدمات کے اعتراف میں انہیں تمغۂ بسالت سے نوازا جانا چاہیے۔ ان کے بقول پوری دنیا میں گروپ کیپٹن عاصم طارق کی قربانی کو قدر کی نگاہ سے دیکھا جا رہا ہے۔
چودھری پرویز الٰہی نے گفتگو کے دوران تلہ گنگ کو شہیدوں اور غازیوں کی سرزمین قرار دیتے ہوئے کہا کہ اس علاقے کے عوام نے ہمیشہ وطن کے لیے بے مثال قربانیاں دی ہیں۔ انہوں نے یاد دلایا کہ اپنے دورِ وزارتِ اعلیٰ میں تلہ گنگ کو ضلع کا درجہ بھی انہی قربانیوں کے اعتراف میں دیا گیا تھا۔
انہوں نے کہا کہ اگر مستقبل میں دوبارہ خدمت کا موقع ملا تو تلہ گنگ کی ترقی اور عوامی فلاح کے منصوبوں کو وہیں سے دوبارہ شروع کیا جائے گا جہاں یہ سلسلہ رکا تھا۔
چودھری پرویز الٰہی نے شہید گروپ کیپٹن عاصم طارق کے درجات کی بلندی، مغفرت اور اہل خانہ کے لیے صبرِ جمیل کی دعا بھی کی۔
