حج 2027 کے لیے متعارف کرائے گئے آن لائن حج رجسٹریشن نظام کو عوام کی جانب سے بھرپور پذیرائی ملی ہے، جہاں پہلے 11 روز کے دوران 2 لاکھ 3 ہزار 722 پاکستانی عازمین نے گھر بیٹھے اپنی رجسٹریشن مکمل کر لی۔
سرکاری اعلامیے کے مطابق 1 لاکھ 80 ہزار سے زائد افراد نے ویب پورٹل کے ذریعے جبکہ 24 ہزار سے زائد عازمین نے موبائل ایپ استعمال کرتے ہوئے رجسٹریشن کا عمل مکمل کیا۔
اعداد و شمار کے مطابق 1 لاکھ 54 ہزار سے زائد درخواست گزاروں نے سرکاری حج اسکیم کا انتخاب کیا، جبکہ تقریباً 49 ہزار افراد نے پرائیویٹ حج اسکیم کے تحت رجسٹریشن کرائی۔
صوبہ وار رجسٹریشن کی تفصیلات کے مطابق پنجاب سرفہرست رہا جہاں 95 ہزار سے زائد افراد نے رجسٹریشن مکمل کی۔ سندھ سے 63 ہزار، خیبر پختونخوا سے 28 ہزار، اسلام آباد سے 9 ہزار، بلوچستان سے 5 ہزار 500، آزاد کشمیر سے 1 ہزار 200 اور گلگت بلتستان سے تقریباً 600 عازمین نے آن لائن اندراج کرایا۔
اعلامیے کے مطابق رجسٹریشن کرانے والوں میں 1 لاکھ 19 ہزار مرد جبکہ 84 ہزار 500 خواتین شامل ہیں، جو خواتین کی نمایاں شرکت کی عکاسی کرتا ہے۔
حکام کا کہنا ہے کہ آن لائن رجسٹریشن نظام کا مقصد عازمین کو آسان، شفاف اور تیز رفتار سہولت فراہم کرنا ہے تاکہ وہ بغیر کسی اضافی دشواری کے گھر بیٹھے حج رجسٹریشن کا عمل مکمل کر سکیں۔
