لاہور: حضرت علی بن عثمان ہجویری المعروف داتا گنج بخش کے 983ویں سالانہ عرس مبارک کی تقریبات کا آغاز جمعرات کو مزار کو غسل دینے اور چادر پوشی کی روح پرور تقریب سے ہو گیا۔
افتتاحی تقریب میں نائب وزیراعظم و وزیر خارجہ اسحاق ڈار نے بطور مہمانِ خصوصی شرکت کی اور مزار مبارک کو عرقِ گلاب سے غسل دینے کے بعد چادر پوشی کی رسم ادا کی۔ تقریب میں صوبائی وزراء بلال یاسین، خواجہ سلمان رفیق اور وزیراعلیٰ پنجاب کے معاونِ خصوصی علی ڈار سمیت علما، مشائخ اور ملک بھر سے آئے ہوئے زائرین کی بڑی تعداد شریک ہوئی۔
اس موقع پر معروف نعت خواں حضرات نے بارگاہِ رسالت مآب ﷺ میں نعتیہ کلام پیش کیا جبکہ زائرین نے ملک کی سلامتی، ترقی اور استحکام کے لیے خصوصی دعائیں کیں۔
تقریب کے بعد میڈیا سے گفتگو کرتے ہوئے اسحاق ڈار نے صدرِ پاکستان آصف علی زرداری، وزیراعظم شہبازشریف، مسلم لیگ (ن) کے قائد نوازشریف اور وزیراعلیٰ پنجاب مریم نواز کی جانب سے قوم کو عرس کی مبارکباد پیش کی۔
انہوں نے داتا دربار کی توسیع اور زائرین کے لیے بہتر سہولیات کی فراہمی کو پنجاب حکومت کی اہم کامیابی قرار دیا اور کہا کہ اس منصوبے کا سہرا وزیراعلیٰ پنجاب اور ان کی ٹیم کو جاتا ہے۔
اسحاق ڈار نے بین الاقوامی امور پر گفتگو کرتے ہوئے کہا کہ پاکستان نے ایران اور امریکا کے درمیان کشیدگی کم کرنے اور مذاکراتی عمل کو آگے بڑھانے میں سہولت کار کا کردار ادا کیا۔ انہوں نے کہا کہ کئی دہائیوں بعد دونوں ممالک مذاکرات کی میز پر آئے اور پاکستان نے اس عمل کے لیے سازگار ماحول فراہم کیا۔
انہوں نے کہا کہ پاکستان ایک ذمہ دار اور امن پسند ملک ہے جو خطے میں استحکام اور سفارتی حل کی حمایت کرتا ہے۔ ان کے مطابق ملک کو دفاعی طاقت کے ساتھ ساتھ معاشی طور پر بھی مضبوط بنانا وقت کی اہم ضرورت ہے۔
نائب وزیراعظم نے معاشی صورتحال پر بات کرتے ہوئے کہا کہ موجودہ حکومت نے مشکلات کے باوجود اقتصادی استحکام کی جانب پیش رفت کی ہے اور نئے بجٹ میں تنخواہ دار طبقے اور کاروباری برادری کو ریلیف دینے کی کوشش کی گئی ہے۔
عرس کی تقریبات کے دوران داتا دربار میں محافلِ ذکر، نعت، قوالی اور خصوصی دعائیہ اجتماعات کا سلسلہ جاری رہے گا، جن میں ملک بھر سے لاکھوں عقیدت مندوں کی شرکت متوقع ہے۔
