فیلڈ مارشل سید عاصم منیر ایران کے شہید سپریم لیڈر آیت اللہ علی خامنہ ای کی نمازِ جنازہ اور تعزیتی تقریبات میں شرکت کے بعد وطن واپسی کے لیے تہران سے روانہ ہو گئے۔
روانگی کے موقع پر ایران کے وزیر داخلہ سکندر مومنی سمیت اعلیٰ سول اور عسکری حکام نے فیلڈ مارشل سید عاصم منیر کو الوداع کیا اور پاکستان کی اعلیٰ عسکری قیادت کی تعزیتی شرکت پر شکریہ ادا کیا۔
اس سے قبل فیلڈ مارشل سید عاصم منیر شہید ایرانی سپریم لیڈر کی آخری رسومات میں شرکت کے لیے تہران پہنچے تھے، جہاں ایرانی وزیر داخلہ اور دیگر اعلیٰ حکام نے ان کا استقبال کیا۔ وفاقی وزیر داخلہ محسن نقوی بھی استقبال کے موقع پر موجود تھے۔
ایرانی سرکاری میڈیا کے مطابق تہران کے امام خمینی حسینیہ میں آیت اللہ علی خامنہ ای کے آخری دیدار کا سلسلہ جاری رہا، جہاں دنیا بھر سے آنے والے سرکاری وفود اور شخصیات نے باری باری حاضری دے کر مرحوم رہنما کو خراجِ عقیدت پیش کیا۔
رپورٹس کے مطابق آیت اللہ علی خامنہ ای کے جسدِ خاکی کے ساتھ ان کے خاندان کے دیگر شہداء کے تابوت بھی رکھے گئے، جن میں ان کی اہلیہ، داماد، ایک بہو اور دو سالہ نواسی شامل تھیں، جو 28 فروری کو ہونے والے حملے میں شہید ہوئے تھے۔
دوسری جانب وزیراعظم شہباز شریف بھی کابینہ کے اہم ارکان کے ہمراہ تہران پہنچے اور تعزیتی تقریبات میں شرکت کی۔ پاکستانی وفد میں نائب وزیراعظم و وزیر خارجہ اسحاق ڈار، وزیر داخلہ محسن نقوی، وزیر اطلاعات عطا اللہ تارڑ، چیئرمین پاکستان پیپلز پارٹی بلاول بھٹو زرداری، اسپیکر قومی اسمبلی سردار ایاز صادق اور وزیراعلیٰ سندھ سید مراد علی شاہ بھی شامل تھے۔
اسی طرح چیئرمین سینیٹ یوسف رضا گیلانی اور گورنر خیبر پختونخوا فیصل کریم کنڈی بھی پہلے سے تہران میں موجود تھے اور انہوں نے بھی تعزیتی رسومات میں شرکت کی۔
پاکستانی قیادت کی اعلیٰ سطح پر شرکت کو پاکستان اور ایران کے درمیان قریبی برادرانہ تعلقات اور باہمی احترام کی علامت قرار دیا جا رہا ہے۔
