دوحہ: قطر کی وزارتِ خارجہ نے واضح کیا ہے کہ امریکی نمائندے جیرڈ کشنر اور اسٹیو وٹکوف اس وقت دارالحکومت دوحہ میں موجود ہیں، تاہم ان کی ایرانی حکام کے ساتھ کوئی براہِ راست ملاقات طے نہیں ہے۔
قطری وزارتِ خارجہ کے ترجمان کے مطابق دونوں امریکی نمائندے ان فریقین سے ملاقاتیں کریں گے جو ایران اور امریکا کے درمیان جاری سفارتی رابطوں میں ثالثی کا کردار ادا کر رہے ہیں۔ ان ملاقاتوں میں جاری مذاکرات کی پیش رفت اور آئندہ امکانات پر تبادلۂ خیال کیا جائے گا۔
ترجمان نے اس تاثر کی بھی نفی کی کہ ایران اور امریکا کے درمیان براہِ راست مذاکرات شروع ہو چکے ہیں، اور کہا کہ موجودہ رابطے ثالثوں کے ذریعے آگے بڑھائے جا رہے ہیں۔
دوسری جانب قطری حکام نے بتایا کہ ایران کے منجمد کیے گئے 6 ارب ڈالر کے اثاثے تاحال تہران منتقل نہیں کیے گئے، جبکہ اس حوالے سے مختلف فریقوں کے درمیان مشاورت جاری ہے۔
یہ پیش رفت ایسے وقت میں سامنے آئی ہے جب خطے میں کشیدگی کم کرنے، آبنائے ہرمز میں بحری آمدورفت کے تحفظ اور ایران۔امریکا مفاہمتی عمل کو آگے بڑھانے کے لیے سفارتی کوششیں تیز ہو گئی ہیں۔
