فیفا ورلڈ کپ 2026 کے لیے پاکستان میں تیار کی گئی جدید ٹیکنالوجی سے لیس فٹبال ’’ٹریونڈا‘‘ (Trionda) نے ایک نئی تاریخ رقم کر دی ہے۔ عالمی سطح پر اپنی اعلیٰ معیار کی تیاری کے باعث شہرت حاصل کرنے والی یہ خصوصی فٹبال اب صرف اسٹیڈیمز اور فٹبال گراؤنڈز تک محدود نہیں رہی بلکہ خلا تک پہنچ چکی ہے، جہاں اسے بین الاقوامی خلائی اسٹیشن (آئی ایس ایس) میں بھی استعمال کیا گیا۔
NASA نے فوٹو اور ویڈیو شیئرنگ پلیٹ فارم انسٹاگرام پر ایک دلچسپ ویڈیو جاری کی ہے، جس میں خلاء بازوں کو بین الاقوامی خلائی اسٹیشن کے اندر فیفا ورلڈ کپ 2026 کے لیے تیار کی گئی جدید فٹبال سے کھیلتے ہوئے دیکھا جا سکتا ہے۔ ویڈیو میں خلاء باز مائیکرو گریویٹی کے ماحول میں گیند کی حرکت، توازن اور ردعمل کا مشاہدہ کرتے نظر آتے ہیں۔
ناسا کے مطابق اس تجربے کا بنیادی مقصد یہ جاننا تھا کہ ایڈیڈاز کی ڈیزائن کردہ اور پاکستان میں تیار کی گئی فٹبال خلا میں کس طرح برتاؤ کرتی ہے اور مائیکرو گریویٹی کی صورتحال اس کی حرکت اور توازن پر کس حد تک اثر انداز ہوتی ہے۔ خلائی ماہرین نے خصوصی طور پر اس بات کا جائزہ لیا کہ وزن کی تقسیم اور گیند کے مرکزِ ثقل میں معمولی تبدیلی کھیل کے دوران اس کے رویے کو کس طرح متاثر کر سکتی ہے۔
ناسا کی جانب سے جاری بیان میں بتایا گیا کہ ایسا تجربہ پہلی مرتبہ نہیں کیا گیا۔ اس سے قبل 2019 میں بھی اسی نوعیت کا ایک تجربہ کیا گیا تھا، جس کے نتائج سے معلوم ہوا تھا کہ گیند کے توازن میں معمولی فرق بھی اس کی سمت اور حرکت کو نمایاں طور پر متاثر کر سکتا ہے۔ اسی تجرباتی سلسلے کو آگے بڑھاتے ہوئے اب فیفا ورلڈ کپ 2026 کی نئی فٹبال ’’ٹریونڈا‘‘ کو بھی خلا میں آزمایا گیا ہے۔
پاکستان کے لیے یہ ایک اہم اعزاز قرار دیا جا رہا ہے کیونکہ دنیا کے بڑے اسپورٹس ایونٹ کے لیے تیار کی گئی گیند نہ صرف عالمی مقابلوں میں استعمال ہو رہی ہے بلکہ خلائی تحقیق کا بھی حصہ بن چکی ہے۔ کھیلوں کے ماہرین کا کہنا ہے کہ سیالکوٹ کی صنعت نے ایک بار پھر ثابت کیا ہے کہ پاکستانی مصنوعات بین الاقوامی معیار کے مطابق ہیں اور دنیا کی معروف کمپنیاں ان پر اعتماد کرتی ہیں۔
واضح رہے کہ پاکستان، خصوصاً سیالکوٹ، دنیا بھر میں فٹبال کی تیاری کا ایک بڑا مرکز سمجھا جاتا ہے اور کئی دہائیوں سے عالمی مقابلوں کے لیے اعلیٰ معیار کی فٹبالیں تیار کی جا رہی ہیں۔ فیفا ورلڈ کپ 2026 کی آفیشل فٹبال ’’ٹریونڈا‘‘ بھی اسی روایت کا تسلسل ہے، جس نے اب زمین سے نکل کر خلاء تک اپنا سفر طے کر لیا ہے۔
ناسا کی جانب سے شیئر کی گئی ویڈیو سوشل میڈیا پر تیزی سے وائرل ہو رہی ہے اور دنیا بھر کے صارفین پاکستان میں تیار کی گئی اس جدید فٹبال کی خلائی سفر میں شمولیت کو ایک منفرد اور قابلِ فخر کامیابی قرار دے رہے ہیں۔
