نیویارک/زیورخ: فیفا نے ایک غیر معمولے فیصلے میں امریکی صدر ڈونلڈ ٹرمپ کی درخواست کے بعد امریکی قومی فٹ بال ٹیم کے فارورڈ فولارن بیلوگن کے ریڈ کارڈ کی سزا معطل کر دی، جس کے نتیجے میں وہ 7 جولائی کو بیلجیم کے خلاف ہونے والے فیفا ورلڈ کپ 2026 کے اہم میچ میں شرکت کے لیے دستیاب ہوں گے۔
ذرائع کے مطابق صدر ٹرمپ نے فیفا کے صدر جیانی انفانٹینو سے ریڈ کارڈ کے فیصلے پر نظرثانی کی درخواست کی تھی، جس کے بعد عالمی فٹ بال تنظیم نے کیس کا جائزہ لے کر معطلی ختم کرنے کا فیصلہ کیا۔
صدر ٹرمپ نے اس فیصلے کا خیرمقدم کرتے ہوئے سوشل میڈیا پر فیفا کا شکریہ ادا کیا اور کہا کہ "آپ نے وہی فیصلہ کیا جو درست تھا۔”
رپورٹس کے مطابق 25 سالہ بیلوگن کو ورلڈ کپ کے راؤنڈ آف 32 میں بوسنیا کے خلاف میچ کے دوران خطرناک فاؤل پر ریفری نے براہِ راست ریڈ کارڈ دکھایا تھا۔ اس مقابلے میں امریکا نے بوسنیا کو 2-0 سے شکست دی تھی۔
فٹ بال قوانین کے مطابق براہِ راست ریڈ کارڈ حاصل کرنے والے کھلاڑی پر اگلے میچ میں خودکار طور پر پابندی عائد ہو جاتی ہے، تاہم فیفا کے حالیہ فیصلے کے بعد بیلوگن اب بیلجیم کے خلاف میدان میں اتریں گے۔
دوسری جانب بیلجیم کی فٹ بال فیڈریشن نے فیفا کے اس فیصلے پر تحفظات کا اظہار کرتے ہوئے قانونی آپشنز پر غور شروع کر دیا ہے۔ بیلجین حکام کا مؤقف ہے کہ ریڈ کارڈ کی معطلی سے ٹورنامنٹ کے ضابطوں پر سوالات پیدا ہو سکتے ہیں۔
واضح رہے کہ فیفا کے صدر جیانی انفانٹینو اور امریکی صدر ڈونلڈ ٹرمپ کے درمیان دوستانہ تعلقات پہلے بھی متعدد مواقع پر زیر بحث آتے رہے ہیں، جس کے باعث اس فیصلے پر عالمی فٹ بال حلقوں میں مختلف ردعمل سامنے آ رہا ہے۔
