پاکستانی ای اسپورٹس ٹیم 4Thrives نے انڈونیشیا کے دارالحکومت Jakarta میں منعقد ہونے والے PUBG Mobile Global Open Season 1 کا ٹائٹل جیت کر ملک کے لیے ایک تاریخی کامیابی حاصل کر لی ہے۔
پاکستانی ٹیم 4 تھرائیوز نے ایونٹ میں براہِ راست جگہ حاصل نہیں کی تھی بلکہ اس نے ’’لاسٹ چانس کوالیفائر‘‘ کے ذریعے مرکزی مرحلے کے لیے کوالیفائی کیا۔ تاہم فائنل مرحلے میں ٹیم نے آغاز ہی سے اپنی برتری قائم رکھی اور حریف ٹیموں کو سخت مقابلہ دیا۔
پب جی موبائل گلوبل اوپن کے پہلے سیزن میں دنیا بھر کی 32 بہترین ٹیموں نے شرکت کی، جہاں 5 لاکھ ڈالر کے انعامی فنڈ کے لیے سخت مقابلہ دیکھنے میں آیا۔ پاکستانی ٹیم نے پورے ٹورنامنٹ کے دوران شاندار اور مستقل کارکردگی کا مظاہرہ کرتے ہوئے بالآخر چیمپئن شپ اپنے نام کر لی۔
ٹورنامنٹ کے آخری مرحلے میں ’’سمیش رول‘‘ نافذ کیا گیا، جس کے تحت مقررہ پوائنٹس کی حد عبور کرنے کے بعد کسی بھی ٹیم کو چیمپئن بننے کے لیے ایک ’’چکن ڈنر‘‘ حاصل کرنا ضروری تھا۔ پاکستانی ٹیم نے فائنل روز کے پہلے میچ میں مطلوبہ پوائنٹس حاصل کر لیے، تاہم بعد کے مقابلوں میں اسے دیگر ٹیموں کی جانب سے سخت دباؤ کا سامنا کرنا پڑا۔
فائنل مرحلے کے پہلے روز پاکستانی ٹیم نے چھ میچز میں مجموعی طور پر 82 پوائنٹس حاصل کر کے پہلی پوزیشن سنبھال لی۔ اس شاندار آغاز نے ٹیم کو ٹائٹل کی دوڑ میں مضبوط مقام فراہم کیا۔
تمام مقابلوں کے اختتام پر پاکستانی ٹیم 4 تھرائیوز نے 122 پوائنٹس کے ساتھ پہلی پوزیشن حاصل کی اور عالمی ٹائٹل اپنے نام کر لیا۔ ULF Esports 104 پوائنٹس کے ساتھ دوسرے جبکہ FURIA Esports 97 پوائنٹس کے ساتھ تیسرے نمبر پر رہی۔
ای اسپورٹس ماہرین کے مطابق یہ کامیابی پاکستان کے لیے تاریخی اہمیت رکھتی ہے کیونکہ یہ پب جی موبائل کے عالمی سطح کے بڑے مقابلوں میں پاکستان کی پہلی بڑی چیمپئن شپ فتح ہے۔ اس کامیابی سے نہ صرف پاکستانی ای اسپورٹس کمیونٹی کا حوصلہ بلند ہوگا بلکہ عالمی سطح پر پاکستان کے نوجوان گیمرز کی صلاحیتوں کو بھی مزید پذیرائی ملے گی۔
