تل ابیب: اسرائیلی فوج کے سربراہ ایال ضمیر نے کہا ہے کہ جیسے ہی سیاسی قیادت کی جانب سے منظوری ملے گی، اسرائیلی فوج ایران کے خلاف بھرپور اور طاقتور کارروائی کرے گی۔
اسرائیلی فوج (IDF) کے مطابق لیفٹیننٹ جنرل ایال ضمیر نے اعلیٰ فوجی افسران کے ساتھ ایک جائزہ اجلاس کے دوران کہا کہ ’’جب گرین لائٹ ملے گی تو اسرائیلی فوج دشمن پر پوری قوت کے ساتھ حملہ کرے گی۔‘‘
فوجی ذرائع کے مطابق اسرائیلی فوج ایران کی جانب سے حالیہ میزائل حملے کے جواب میں ممکنہ کارروائی کی تیاری مکمل کر چکی ہے، تاہم حتمی اقدام کے لیے سیاسی سطح پر منظوری کا انتظار کیا جا رہا ہے۔
یہ بیان ایسے وقت میں سامنے آیا ہے جب ایران نے شمالی اسرائیل کی جانب میزائل فائر کیے ہیں، جس کے بعد خطے میں کشیدگی مزید بڑھ گئی ہے۔
دوسری جانب امریکی صدر ڈونلڈ ٹرمپ نے کہا ہے کہ وہ اسرائیلی وزیر اعظم نیتن یاہو سے رابطے میں ہیں اور انہیں ایران کے خلاف فوری جوابی کارروائی سے گریز کرنے کا مشورہ دے رہے ہیں تاکہ جاری سفارتی کوششوں کو نقصان نہ پہنچے۔
علاقائی مبصرین کے مطابق آئندہ چند گھنٹے ایران اور اسرائیل کے درمیان کشیدگی کے مستقبل کا تعین کرنے میں اہم ثابت ہو سکتے ہیں، جبکہ عالمی برادری دونوں فریقوں سے تحمل اور سفارتی راستہ اختیار کرنے کی اپیل کر رہی ہے۔
