سعودی وزارت حج و عمرہ نے اعلان کیا ہے کہ رواں سال حج کے موقع پر خطبۂ حج دنیا بھر میں بولی جانے والی 35 بڑی زبانوں میں ترجمے کے ساتھ نشر کیا جائے گا۔
وزارت کے مطابق اس اقدام کا مقصد دنیا کے مختلف ممالک سے آنے والے لاکھوں عازمین حج اور ناظرین تک خطبۂ حج کا پیغام آسان اور مؤثر انداز میں پہنچانا ہے تاکہ ہر مسلمان اپنی مادری زبان میں اس روحانی پیغام کو سمجھ سکے۔
اعلان میں بتایا گیا ہے کہ خطبۂ حج کو انگلش، فرنچ، انڈونیشین، ترکی، فارسی، روسی، چینی اور دیگر اہم عالمی زبانوں سمیت متعدد زبانوں میں براہ راست ترجمے کے ساتھ نشر کیا جائے گا۔
خصوصی طور پر پاکستان کے عازمین کے لیے خطبۂ حج کو اردو کے ساتھ ساتھ علاقائی زبانوں پنجابی اور پشتو میں بھی ترجمے کے ساتھ پیش کیا جائے گا۔
سعودی حکام کے مطابق جدید ڈیجیٹل پلیٹ فارمز اور اسمارٹ ٹیکنالوجی کے ذریعے خطبۂ حج کو دنیا بھر میں لاکھوں افراد تک پہنچایا جائے گا تاکہ زیادہ سے زیادہ مسلمان اس سے استفادہ حاصل کر سکیں۔
ماہرین کے مطابق خطبۂ حج کی مختلف زبانوں میں نشریات نہ صرف اسلامی تعلیمات کے فروغ میں اہم کردار ادا کریں گی بلکہ حج کے عالمی پیغام کو بھی مزید مؤثر انداز میں دنیا تک پہنچائیں گی۔
