اسپیشل اولمپکس پاکستان نیشنل گیمز میں پنجاب نے شاندار کارکردگی کا مظاہرہ کرتے ہوئے مجموعی طور پر 12 گولڈ اور 13 سلور میڈلز جیت کر ٹائٹل اپنے نام کر لیا۔
پاکستان سپورٹس کمپلیکس میں منعقد ہونے والے تین روزہ ایونٹ میں مختلف صوبوں اور ریجنز کے خصوصی کھلاڑیوں نے بھرپور حصہ لیا۔ مجموعی میڈل ٹیبل میں سندھ نے 9 گولڈ اور 10 سلور میڈلز کے ساتھ دوسری جبکہ وفاقی ریجن نے 8 گولڈ اور 9 سلور میڈلز کے ساتھ تیسری پوزیشن حاصل کی۔
اختتامی تقریب میں وفاقی سیکریٹری بین الصوبائی رابطہ اور ڈائریکٹر جنرل پاکستان سپورٹس بورڈ محی الدین احمد وانی مہمانِ خصوصی تھے۔ تقریب میں اسپیشل اولمپکس پاکستان کی چیف ایگزیکٹو رونق لاکھانی، سابق ڈی جی پاکستان اسپورٹس بورڈ اختر نواز گنجیرا اور اسلام آباد اولمپک ایسوسی ایشن کے سیکریٹری رضوان الحق رازی نے بھی شرکت کی اور کامیاب کھلاڑیوں میں انعامات تقسیم کیے۔
گیمز کے آخری روز 200 میٹر مینز فائنل پلس سی کیٹیگری میں سندھ کے احمد رجب نے 28.01 سیکنڈز کے ساتھ گولڈ میڈل جیتا، جبکہ پنجاب کے محمد عادل خان اور طیب وحید نے بالترتیب سلور اور برانز میڈلز حاصل کیے۔
800 میٹر لیول بی مقابلے میں بلوچستان کے محمد جابر نے 2 منٹ 41.88 سیکنڈز کے وقت کے ساتھ پہلی پوزیشن حاصل کی۔ وفاقی ریجن کے محمد واصف دوسرے جبکہ سندھ کے ارسلان آفتاب تیسرے نمبر پر رہے۔
ویمنز 800 میٹر لیول سی ایونٹ میں سندھ کی کھلاڑیوں نے نمایاں کارکردگی دکھائی، جہاں ثناء نے گولڈ، نوشین بانو نے سلور اور تبسم نے برانز میڈل اپنے نام کیا۔
شاٹ پٹ مقابلوں میں خیبر پختونخواہ کے باسط علی نے 8.47 میٹر کی تھرو کے ساتھ گولڈ میڈل حاصل کیا، جبکہ پنجاب کے محمد عثمان دوسرے اور وفاقی ریجن کے ہمایوں اسلم تیسرے نمبر پر رہے۔
اسپیشل اولمپکس پاکستان نیشنل گیمز میں خصوصی کھلاڑیوں کی بھرپور شرکت اور اعلیٰ کارکردگی کو کھیلوں کے فروغ اور معاشرتی شمولیت کی جانب اہم پیش رفت قرار دیا جا رہا ہے۔
