سعودی وزارت داخلہ نے حج 2026 کے سلسلے میں عازمینِ حج کے لیے اہم ہدایات جاری کر دی ہیں، جن کا مقصد زائرین کے سفرِ حج کو محفوظ، منظم اور آسان بنانا ہے۔
سعودی خبر رساں ایجنسی کے مطابق وزارتِ داخلہ نے کہا ہے کہ ان ہدایات پر عمل سے عازمین کو مسجد الحرام اور مشاعر مقدسہ میں آمد و رفت، عبادات اور رہنمائی میں سہولت حاصل ہوگی۔
جاری کردہ ہدایات میں مسجد الحرام کے مختلف داخلی و خارجی راستوں کی وضاحت کی گئی ہے، جبکہ ان مخصوص ٹریکس کی بھی نشاندہی کی گئی ہے جن کے ذریعے طوافِ کعبہ اور سعی کے مقام تک آسانی سے پہنچا جا سکتا ہے۔
وزارتِ داخلہ نے بتایا کہ مسجد الحرام میں ویل چیئر اور الیکٹرک چیئر استعمال کرنے والے افراد کے لیے خصوصی راستے مختص کیے گئے ہیں، جہاں متعلقہ سہولیات بھی فراہم کی گئی ہیں۔
ہدایات میں عازمین کو تاکید کی گئی ہے کہ سعی کا مقام صرف سعی ادا کرنے والوں کے لیے مخصوص ہے، اس لیے وہاں غیر ضروری بیٹھنے سے گریز کیا جائے۔
جسمانی تحفظ کے حوالے سے وزارت نے مشورہ دیا ہے کہ ازدحام کے اوقات میں عازمین ماسک کا استعمال کریں تاکہ صحت و سلامتی کو یقینی بنایا جا سکے۔
سعودی وزارتِ داخلہ نے حج ضوابط کی پابندی پر زور دیتے ہوئے خبردار کیا کہ پرمٹ کے بغیر مکہ یا مشاعر مقدسہ میں داخل ہونا قانون شکنی تصور ہوگا، جس پر سخت سزائیں مقرر ہیں۔
