واشنگٹن: امریکا کی 25 ڈیموکریٹک ریاستوں نے صدر ڈونلڈ ٹرمپ کی انتظامیہ کے خلاف وفاقی عدالت میں مقدمہ دائر کرتے ہوئے مؤقف اختیار کیا ہے کہ حالیہ تجارتی ٹیرف غیر قانونی ہیں اور انتظامیہ کے آئینی اختیارات سے تجاوز کرتے ہیں۔
عدالتی درخواست کے مطابق صدر ٹرمپ کی جانب سے تقریباً 60 تجارتی شراکت دار ممالک اور یورپی یونین پر نئے ٹیرف عائد کیے گئے، جنہیں ریاستوں نے امریکی قوانین اور آئینی اختیارات کے منافی قرار دیا ہے۔
ریاستوں کا کہنا ہے کہ یہ نئے ٹیرف دراصل ان پرانے محصولات کی جگہ لینے کی کوشش ہیں جنہیں اس سے قبل امریکی سپریم کورٹ غیر قانونی قرار دے چکی تھی۔ درخواست گزاروں کے مطابق انتظامیہ کانگریس کی منظوری کے بغیر ایسے محصولات نافذ نہیں کر سکتی۔
مقدمے میں عدالت سے استدعا کی گئی ہے کہ نئے ٹیرف کو غیر مؤثر قرار دیا جائے اور ان کے نفاذ کو فوری طور پر روکا جائے۔
دوسری جانب ٹرمپ انتظامیہ کی جانب سے فوری طور پر مقدمے پر کوئی باضابطہ ردعمل سامنے نہیں آیا۔ تاہم انتظامیہ اس سے قبل مؤقف اختیار کرتی رہی ہے کہ امریکی صنعت، مقامی معیشت اور قومی مفادات کے تحفظ کے لیے تجارتی اقدامات ضروری ہیں۔
ماہرین کے مطابق اگر عدالت نے ریاستوں کے مؤقف کو تسلیم کر لیا تو اس فیصلے کے امریکا کی تجارتی پالیسی، بین الاقوامی تجارت اور عالمی منڈیوں پر اہم اثرات مرتب ہو سکتے ہیں۔
