واشنگٹن، امریکی فوج کی سینٹرل کمانڈ (CENTCOM) نے تصدیق کی ہے کہ اس نے ایران میں نئے فضائی حملے کیے ہیں، جنہیں مشرقِ وسطیٰ میں امریکی افواج پر ایک روز قبل ہونے والے ایرانی حملوں کا "طاقتور جواب” قرار دیا گیا ہے۔
سینٹکام کی جانب سے جاری بیان میں کہا گیا کہ یہ کارروائی امریکی افواج کو نشانہ بنانے والے حملوں کے ردعمل میں کی گئی، تاہم فوری طور پر حملوں کے اہداف، مقام، نقصان یا دیگر عسکری تفصیلات جاری نہیں کی گئیں۔
یہ کارروائی ایسے وقت میں سامنے آئی ہے جب امریکی صدر ڈونلڈ ٹرمپ نے ایرانی حملوں کے جواب میں سخت ردعمل دینے کا عندیہ دیا تھا۔ حالیہ فضائی حملوں سے چند روز قبل ٹرمپ نے دونوں ممالک کے درمیان دشمنی روکنے کے لیے جنگ بندی جیسے وقفے کا اعلان کیا تھا، تاہم تازہ پیش رفت کے بعد کشیدگی ایک بار پھر بڑھ گئی ہے۔
دوسری جانب ایران کی جانب سے فوری طور پر امریکی دعوے پر کوئی باضابطہ ردعمل سامنے نہیں آیا، جبکہ خطے کی صورتحال پر عالمی برادری کی گہری نظر ہے۔
تجزیہ کاروں کے مطابق امریکی حملوں کے بعد مشرقِ وسطیٰ میں سکیورٹی صورتحال مزید پیچیدہ ہو سکتی ہے اور آئندہ چند روز میں دونوں ممالک کے بیانات اور ممکنہ اقدامات پر عالمی توجہ مرکوز رہے گی۔
