بلغراد: سربیا میں پاکستان کے سفیر فراز احمد زیدی نے جمہوریہ سربیا کی قومی اسمبلی کے نائب صدر ایڈن ڈیرلیک کے اعزاز میں پاکستان ہاؤس، بلغراد میں ظہرانے کا اہتمام کیا، جہاں دونوں رہنماؤں نے پاکستان اور سربیا کے دوطرفہ تعلقات اور پارلیمانی تعاون کے فروغ پر تفصیلی تبادلہ خیال کیا۔
ملاقات کے دوران باہمی دلچسپی کے مختلف امور، پارلیمانی روابط کے فروغ اور دونوں ممالک کے درمیان تعاون کو مزید مستحکم بنانے کے امکانات پر گفتگو کی گئی۔
فریقین نے پاکستان اور سربیا کے درمیان موجود دوستانہ تعلقات کو مزید گہرا کرنے، پارلیمانی سفارت کاری کو فروغ دینے اور مختلف شعبوں میں باہمی تعاون کو وسعت دینے کے عزم کا اعادہ کیا۔
اس موقع پر دونوں جانب سے اس بات پر اتفاق کیا گیا کہ پارلیمانی سطح پر روابط اور اعلیٰ سطحی تبادلوں سے نہ صرف دوطرفہ تعلقات مضبوط ہوں گے بلکہ باہمی اعتماد اور مختلف شعبوں میں تعاون کے نئے مواقع بھی پیدا ہوں گے۔
پاکستان اور سربیا کے درمیان حالیہ برسوں میں سفارتی اور پارلیمانی روابط میں اضافہ دیکھا گیا ہے، جبکہ دونوں ممالک باہمی احترام اور مشترکہ مفادات کی بنیاد پر تعلقات کو مزید وسعت دینے کے خواہاں ہیں۔
