لندن: سینیٹ آف پاکستان کے ارکان پر مشتمل ایک پارلیمانی وفد نے برطانیہ کے دورے کے دوران پاکستان ہائی کمیشن لندن کا دورہ کیا، جہاں وفد نے پاکستان کے ہائی کمشنر ٹیپو عثمان سے ملاقات کی۔
وفد میں سینیٹر ثمینہ ممتاز زہری، سینیٹر عطا الرحمان، سینیٹر جام سیف اللہ خان اور سینیٹر عطاء الحق شامل تھے۔ ملاقات کے دوران پاکستان اور برطانیہ کے درمیان پارلیمانی تعاون، باہمی دلچسپی کے امور اور دوطرفہ تعلقات کے مختلف پہلوؤں پر تبادلہ خیال کیا گیا۔
برطانیہ کے دورے کے دوران پاکستانی سینیٹرز نے آکسفورڈ شائر میں واقع وکسٹن کالج میں منعقدہ سترہویں پارلیمانی سکالرز اینڈ پارلیمنٹرینز ورکشاپ میں بھی شرکت کی۔
ورکشاپ میں پارلیمانی امور، قانون سازی، پبلک پالیسی، جمہوری اداروں کے کردار اور بین الاقوامی پارلیمانی تعاون سے متعلق مختلف موضوعات پر تبادلہ خیال کیا گیا، جبکہ شرکاء کو تجربات کے تبادلے اور باہمی روابط کو فروغ دینے کا موقع بھی ملا۔
دورے کا مقصد پاکستانی پارلیمنٹ اور بین الاقوامی پارلیمانی اداروں کے درمیان تعاون کو فروغ دینا اور قانون سازوں کی پیشہ ورانہ استعداد میں مزید بہتری لانا تھا۔
