اسلام آباد: آذربائیجان کے سبکدوش ہونے والے سفیر خضر فرہادوف نے وفاقی وزیر برائے تجارت جام کمال خان سے الوداعی ملاقات کی، جس میں پاکستان اور آذربائیجان کے درمیان تجارتی، اقتصادی اور سرمایہ کاری کے شعبوں میں تعاون کے فروغ پر تبادلہ خیال کیا گیا۔
وزارت تجارت کے ترجمان کے مطابق جام کمال خان نے خضر فرہادوف کی سفارتی خدمات کو سراہتے ہوئے کہا کہ ان کے دورِ سفارت میں پاکستان اور آذربائیجان کے تعلقات تاریخی بلندیوں تک پہنچے۔ انہوں نے دوطرفہ روابط کو مضبوط بنانے، اقتصادی تعاون کے فروغ اور دونوں ممالک کے درمیان اعتماد کی فضا قائم کرنے میں سفیر کے کردار کو قابلِ تحسین قرار دیا۔
وفاقی وزیر نے کہا کہ پاکستان اور آذربائیجان کے درمیان آٹھویں مشترکہ وزارتی کمیشن، ترجیحی تجارتی معاہدے (Preferential Trade Agreement) اور 15 معاہدوں و مفاہمتی یادداشتوں پر دستخط دونوں ممالک کے اقتصادی تعلقات میں اہم پیش رفت ثابت ہوئے ہیں۔
اس موقع پر آذربائیجان کے سفیر خضر فرہادوف نے کہا کہ آذربائیجان کے سرمایہ کاروں کو پاکستان کے اسپیشل اکنامک زونز اور صنعتی مراکز کے دوروں کی دعوت دی گئی ہے، جبکہ آذربائیجان کی پاکستان میں مجوزہ سرمایہ کاری، بالخصوص توانائی کے شعبے میں، جلد عملی شکل اختیار کرے گی۔
انہوں نے مزید کہا کہ پاکستان توانائی، انفراسٹرکچر، مینوفیکچرنگ، سیاحت اور لاجسٹکس سمیت مختلف شعبوں میں غیر ملکی سرمایہ کاروں کے لیے وسیع مواقع فراہم کر رہا ہے، جن سے دونوں ممالک کو مشترکہ اقتصادی فوائد حاصل ہو سکتے ہیں۔
جام کمال خان نے خضر فرہادوف کی کامیاب سفارتی خدمات کو پاکستان اور آذربائیجان کے تعلقات کا "سنہری باب” قرار دیتے ہوئے ان کے لیے مستقبل کی ذمہ داریوں میں نیک خواہشات کا اظہار کیا۔
