اسلامی تہذیب کی بنیاد علم، رواداری اور اعلیٰ انسانی اقدار پر قائم ہے: ڈاکٹر محمد العیسیٰ

تاشقند / مکہ مکرمہ: سیکرٹری جنرل رابطہ عالم اسلامی اور چیئرمین مسلم علماء کونسل، فضیلۃ الشیخ ڈاکٹر محمد بن عبدالکریم العیسیٰ نے جمہوریہ ازبکستان کے صدر کی سرپرستی میں تاشقند میں منعقدہ پہلے بین الاقوامی اسلامی فورم سے ویڈیو لنک کے ذریعے مرکزی خطاب کیا۔ اس فورم کا عنوان "اسلامی تہذیب: امن، رواداری اور روشن خیالی کا راستہ” رکھا گیا تھا۔

اپنے خطاب میں ڈاکٹر محمد العیسیٰ نے ازبکستان کی علمی و تاریخی اہمیت کو سراہتے ہوئے کہا کہ ازبکستان کی سرزمین امام بخاریؒ اور امام ترمذیؒ کی علمی میراث کی امین ہے، جن کے لا زوال علمی کارناموں نے اسلامی تہذیب کو جلا بخشی۔ انہوں نے کہا کہ ہماری اسلامی تہذیب تاریخ کے چند اوراق تک محدود نہیں بلکہ اس حقیقت کی گواہ ہے کہ جب ایمان علم کے ساتھ ملتا ہے تو تاریخ روشن ہوتی ہے۔

انہوں نے مزید کہا کہ ماضی کے اس عظیم ورثے پر صرف فخر کرنا کافی نہیں بلکہ وقت کی ضرورت ہے کہ اس تہذیبی روح کو علم و عمل کے ذریعے دورِ حاضر میں دوبارہ زندہ کیا جائے۔ انہوں نے تاشقند میں "اسلامی تہذیب مرکز” اور سمرقند میں "امام بخاری یادگاری کمپلیکس” کے قیام کو سراہتے ہوئے اسے عالمِ اسلام کے لیے گراں قدر علمی و تحقیقی پیش رفت قرار دیا۔