مکہ مکرمہ : رابطۃ العالم الاسلامی نے عراق میں موجود ایران نواز دہشت گرد ملیشیاؤں کی جانب سے مملکتِ سعودی عرب پر کیے گئے ڈرون حملوں کی شدید الفاظ میں مذمت کی ہے۔ رابطۃ نے ڈرونز کو بروقت ناکام بنانے اور جارحیت کو موثر انداز میں ناکارہ بنانے پر متعلقہ اداروں کی اعلیٰ پیشہ ورانہ صلاحیت کو سراہا ہے۔
رابطہ کے جنرل سیکریٹریٹ سے جاری بیان میں سیکریٹری جنرل رابطہ اور چیئرمین مسلم علماء کونسل، فضیلۃ الشیخ ڈاکٹر محمد بن عبدالکریم العیسیٰ نے ان بز دلانہ مجرمانہ حملوں کی شدید مذمت کرتے ہوئے کہا کہ یہ کارروائیاں تمام دینی اقدار، بین الاقوامی قوانین اور انسانی روایات کی صریح خلاف ورزی ہیں۔
ڈاکٹر العیسیٰ نے رابطہ کے عالمی مجامع، ہیئات اور مجالس نیز اس کے زیرِ سایہ تمام اسلامی اقوام کی جانب سے مملکتِ سعودی عرب کے ساتھ مکمل یکجہتی کا اعادہ کیا۔ انہوں نے اس امر پر زور دیا کہ رابطہ جارحیت کا منہ توڑ جواب دینے، اپنی سلامتی، خود مختاری، شہریوں اور اپنی سرزمین پر مقیم افراد کے تحفظ کے لیے مملکت کی جانب سے کیے جانے والے تمام اقدامات کی بھرپور تائید کرتی ہے۔ انہوں نے اللہ تعالیٰ سے دعا کی کہ وہ مملکتِ سعودی عرب کو اس کی سرزمین، قیادت اور عوام سمیت ہر قسم کے شر اور آفت سے محفوظ رکھے۔
