کابل: ازبکستان کے نائب وزیر اعظم جمشید خودجائیف کی قیادت میں ایک اعلیٰ سطحی وفد نے افغانستان کا دورہ کیا، جہاں دونوں ممالک کے درمیان اقتصادی، تجارتی اور سیاسی تعلقات کو مزید مضبوط بنانے پر تبادلہ خیال کیا گیا۔
افغانستان کی عبوری حکومت (امارت اسلامیہ) کے نائب ترجمان ملا حمد اللہ فطرت کے مطابق، نگراں وزیر اعظم ملا محمد حسن اخوند نے اتوار کے روز گلخانہ پیلس میں ازبک وفد سے ملاقات کی۔ وفد میں وزراء، نائب وزراء، سرمایہ کار اور کاروباری شخصیات بھی شامل تھیں۔
جمشید خودجائیف نے کہا کہ یہ دورہ ازبک صدر شوکت مرزییوئیف کی ہدایت پر کیا جا رہا ہے اور اس کا مقصد دونوں ممالک کے درمیان تجارت، سرمایہ کاری اور سیاسی تعاون کو مزید وسعت دینا ہے۔ انہوں نے کہا کہ ازبکستان کی خارجہ پالیسی میں افغانستان کو خصوصی اہمیت حاصل ہے اور دونوں ممالک کے درمیان طے پانے والے اقتصادی معاہدوں پر عملی پیش رفت اس دورے کا اہم مقصد ہے۔
انہوں نے بتایا کہ گزشتہ سال افغانستان کی ازبکستان کو برآمدات 150 ملین ڈالر رہیں، جبکہ رواں سال کے ابتدائی مہینوں میں ہی یہ حجم 111 ملین ڈالر تک پہنچ چکا ہے، جس سے سال کے اختتام تک مزید اضافے کی توقع ہے۔
ازبک نائب وزیر اعظم کے مطابق اب تک 5 ہزار افغان شہریوں کو ازبک ویزے جاری کیے جا چکے ہیں، جو دونوں ممالک کے درمیان بڑھتے ہوئے عوامی روابط، تجارتی سرگرمیوں اور اقتصادی تعاون کی علامت ہیں۔
اس موقع پر وزیر اعظم ملا محمد حسن اخوند نے ازبک وفد کا خیرمقدم کرتے ہوئے کہا کہ یہ دورہ دونوں ممالک کے تعلقات کو مزید مضبوط بنانے کی جانب ایک اہم پیش رفت ہے اور افغانستان کے مستقبل پر ازبکستان کے اعتماد کا اظہار بھی ہے۔
انہوں نے اس عزم کا اعادہ کیا کہ افغانستان ازبکستان کے ساتھ دوطرفہ تعلقات کو مزید فروغ دینے اور باہمی معاہدوں پر مؤثر عمل درآمد کے لیے ہر ممکن تعاون جاری رکھے گا۔
