ایران نے انسانی حقوق سے متعلق یورپی یونین کے مؤقف پر سخت ردعمل دیتے ہوئے اسے دوہرا معیار اور منافقت قرار دیا ہے۔
ایرانی وزارت خارجہ کے ترجمان اسماعیل بقائی نے یورپی یونین کی خارجہ پالیسی کی سربراہ کایا کالاس کے حالیہ بیان پر ردعمل میں کہا کہ یورپی یونین ایک جانب انسانی حقوق کے تحفظ کی بات کرتی ہے، جبکہ دوسری جانب ایران پر حملوں کی حمایت کرتی نظر آتی ہے۔
انہوں نے کہا کہ ایران میں ہونے والے حملوں کے دوران عام شہریوں اور اہم انفراسٹرکچر کو نشانہ بنایا جا رہا ہے، لیکن یورپی یونین ان واقعات پر خاموش تماشائی بنی ہوئی ہے۔ اسماعیل بقائی کے مطابق یورپی یونین کو ان بچوں کی ہلاکتوں پر بھی کوئی تشویش نہیں جو امریکی بمباری میں جان سے ہاتھ دھو بیٹھے۔
ایرانی ترجمان کا کہنا تھا کہ اگر انسانی حقوق کے حوالے سے یورپی یونین کا مؤقف غیر جانبدار اور اصولی ہوتا تو وہ جنگی جرائم اور شہری ہلاکتوں پر بھی یکساں آواز اٹھاتی۔
واضح رہے کہ یورپی یونین کی خارجہ پالیسی کی سربراہ کایا کالاس نے حال ہی میں ایران میں انسانی حقوق کی مبینہ خلاف ورزیوں پر تشویش کا اظہار کرتے ہوئے ایک بیان جاری کیا تھا، جس کے بعد تہران کی جانب سے یہ سخت ردعمل سامنے آیا۔
