اسلام آباد: وزیراعظم شہباز شریف اور چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر نے جدید اسکائی47 ڈیٹا سینٹر "قراقرم ون” کا باضابطہ افتتاح کر دیا، جسے پاکستان کی ڈیجیٹل معیشت، کلاؤڈ انفراسٹرکچر اور مصنوعی ذہانت کی صلاحیتوں کے فروغ کی جانب ایک اہم پیش رفت قرار دیا جا رہا ہے۔
افتتاحی تقریب کے دوران وزیراعظم کو اسکائی47 قراقرم ون ڈیٹا سینٹر پر تفصیلی بریفنگ دی گئی۔ بریفنگ میں بتایا گیا کہ یہ جدید مرکز کلاؤڈ کمپیوٹنگ، ڈیٹا ہوسٹنگ، ہائی پرفارمنس کمپیوٹنگ، مصنوعی ذہانت (AI) اور مشین لرننگ کی بڑھتی ہوئی ضروریات کو پورا کرنے کی صلاحیت رکھتا ہے اور پاکستان کے ڈیجیٹل انفراسٹرکچر کو مزید مضبوط بنائے گا۔
تقریب سے خطاب کرتے ہوئے وزیراعظم شہباز شریف نے کہا کہ جدید ترین ڈیٹا سینٹر انتہائی متاثر کن اور قابلِ تحسین منصوبہ ہے، جسے غیر معمولی عزم، اعلیٰ مہارت اور مختصر مدت میں مکمل کیا گیا۔ انہوں نے منصوبے کی تکمیل پر تمام متعلقہ اداروں اور شراکت داروں کو مبارکباد پیش کی۔
وزیراعظم نے فیلڈ مارشل سید عاصم منیر کی قیادت اور منصوبے میں تعاون کرنے والے بین الاقوامی شراکت دار زیڈ ٹی ای (ZTE) کے کردار کو بھی سراہتے ہوئے کہا کہ متحد ہو کر کام کیا جائے تو کوئی بھی قومی ہدف ناقابلِ حصول نہیں رہتا۔
انہوں نے کہا کہ اسکائی47 جیسے منصوبے پاکستان کے ٹیکنالوجی کے شعبے میں خود انحصاری، ڈیجیٹل خودمختاری اور مستقبل کی معاشی ترقی کی بنیاد ہیں۔ ان کے بقول یہ منصوبہ نہ صرف جدید ڈیجیٹل خدمات کو فروغ دے گا بلکہ ملک کی سائبر اور ڈیجیٹل سیکیورٹی کو بھی مزید مضبوط بنائے گا۔
وفاقی وزیر برائے انفارمیشن ٹیکنالوجی شزا فاطمہ خواجہ نے اپنے خطاب میں کہا کہ اسکائی47 ڈیٹا سینٹر کا افتتاح پاکستان میں مصنوعی ذہانت کے نئے دور کا آغاز ہے۔ انہوں نے کہا کہ ملک اپنے ڈیٹا، انسانی وسائل اور جدید ٹیکنالوجی سے بھرپور استفادہ کرتے ہوئے نئی معاشی ترقی کی راہ پر گامزن ہوگا۔
شزا فاطمہ نے مزید کہا کہ ڈیٹا کو قابلِ عمل معلومات میں تبدیل کرنا اور مصنوعی ذہانت کو حقیقی معاشی قدر میں ڈھالنا مستقبل کی کامیابی کی بنیاد ہے، جبکہ محفوظ، کم لاگت اور مؤثر AI انفراسٹرکچر عالمی مسابقت میں فیصلہ کن کردار ادا کرے گا۔
