کرغزستان میں ایس سی او وزرائے خارجہ کونسل اجلاس، اسحاق ڈار کی رکن ممالک کے وزرائے خارجہ سے اہم ملاقاتیں متوقع

اسلام آباد: نائب وزیراعظم اور وزیر خارجہ سینیٹر محمد اسحاق ڈار جمہوریہ کرغزستان کے وزیر خارجہ ژین بیک کولوبایف کی دعوت پر 23 اور 24 جولائی کو کرغزستان کے شہر چولپون آتا میں منعقد ہونے والے شنگھائی تعاون تنظیم (SCO) کی وزرائے خارجہ کونسل کے اجلاس میں پاکستانی وفد کی قیادت کریں گے۔

دفتر خارجہ کے مطابق اجلاس میں پاکستان، چین، بیلاروس، بھارت، ایران، قازقستان، کرغزستان، روس، تاجکستان اور ازبکستان سمیت شنگھائی تعاون تنظیم کے تمام رکن ممالک کے وزرائے خارجہ شرکت کریں گے۔

بیان میں کہا گیا ہے کہ وزرائے خارجہ کونسل ایس سی او کا تیسرا اعلیٰ ترین فورم ہے، جہاں تنظیم کے رکن ممالک کی خارجہ پالیسی، علاقائی سلامتی، بین الاقوامی امور اور باہمی تعاون سے متعلق اہم معاملات پر غور کیا جاتا ہے۔

دفتر خارجہ کے مطابق دورہ کرغزستان کے دوران نائب وزیراعظم اور وزیر خارجہ اسحاق ڈار کرغزستان کے صدر سے بھی ملاقات کریں گے، جبکہ اجلاس کے موقع پر ایس سی او کے رکن ممالک کے اپنے ہم منصبوں کے ساتھ متعدد دوطرفہ ملاقاتیں بھی کریں گے۔

ان ملاقاتوں میں دوطرفہ تعلقات، علاقائی تعاون، اقتصادی روابط، سلامتی، تجارت اور باہمی دلچسپی کے دیگر امور پر تبادلہ خیال کیے جانے کا امکان ہے۔