امریکی صدر ڈونلڈ ٹرمپ نے اعلان کیا ہے کہ چینی صدر شی جن پنگ 24 ستمبر کو امریکہ کا دورہ کریں گے، جہاں دونوں رہنما مصنوعی ذہانت (AI) سمیت باہمی دلچسپی کے اہم امور پر تبادلہ خیال کریں گے۔
رائٹرز کے مطابق صدر ٹرمپ نے کہا کہ رواں سال بیجنگ کے اپنے دورے کے دوران انہوں نے صدر شی جن پنگ کے ساتھ مصنوعی ذہانت کے موضوع پر بات چیت کی تھی، اور اب اسی سلسلے کو امریکہ میں ہونے والی ملاقات کے دوران مزید آگے بڑھایا جائے گا۔
ٹرمپ کا کہنا تھا کہ "صدر شی 24 ستمبر کو امریکہ آ رہے ہیں، ہم نے بیجنگ میں مصنوعی ذہانت کے بارے میں گفتگو کی تھی اور اب دوبارہ اسی موضوع پر بات کریں گے۔”
یہ مجوزہ دورہ ایسے وقت میں سامنے آیا ہے جب دونوں ممالک تجارتی، ٹیکنالوجی اور عالمی سلامتی کے معاملات پر رابطے بڑھانے کی کوشش کر رہے ہیں۔ اس سال کے آغاز میں صدر ٹرمپ نے چین کا دورہ کیا تھا، جہاں انہوں نے صدر شی جن پنگ کو وائٹ ہاؤس آنے کی دعوت بھی دی تھی۔
دوسری جانب امریکی وزیر خارجہ مارکو روبیو اور چینی وزیر خارجہ وانگ یی کے درمیان حالیہ ملاقات میں بھی دونوں ممالک کے درمیان اعلیٰ سطح کے دورے کو کامیاب بنانے اور تعاون کے نئے شعبوں پر کام کرنے پر اتفاق کیا گیا تھا۔
امریکی اور چینی قیادت کی متوقع ملاقات کو عالمی سفارت کاری، مصنوعی ذہانت، تجارت اور دوطرفہ تعلقات کے تناظر میں اہم پیش رفت قرار دیا جا رہا ہے۔
