واشنگٹن: امریکی صدر ڈونلڈ ٹرمپ نے ایران کو ایک بار پھر سخت انتباہ دیتے ہوئے کہا ہے کہ اگر ایران آبنائے ہرمز میں کسی بھی جہاز کو نشانہ بناتا ہے تو امریکا فوری اور سخت ردعمل دے گا۔
اپنے تازہ بیان میں صدر ٹرمپ نے کہا کہ اگر ایران کسی تجارتی یا دیگر جہاز پر میزائل، راکٹ، ڈرون یا کسی بھی دوسرے ہتھیار سے حملہ کرتا ہے تو امریکا اس کے جواب میں ایران کے اہم انفراسٹرکچر کو نشانہ بنائے گا۔
انہوں نے واضح کیا کہ ایسے ہر حملے کے بدلے ایران کے ایک پل یا بجلی گھر کو تباہ کیا جائے گا۔ ٹرمپ کے مطابق امریکا خطے میں جہاز رانی کی آزادی اور عالمی تجارتی راستوں کے تحفظ کے لیے ہر ضروری اقدام اٹھائے گا۔
امریکی صدر کا یہ بیان ایسے وقت سامنے آیا ہے جب ایران اور امریکا کے درمیان کشیدگی برقرار ہے اور آبنائے ہرمز میں بحری سلامتی کے حوالے سے خدشات میں اضافہ ہو رہا ہے۔ آبنائے ہرمز عالمی توانائی کی ترسیل کے لیے نہایت اہم گزرگاہ سمجھی جاتی ہے، جہاں کسی بھی قسم کی کشیدگی عالمی تیل کی منڈی اور بین الاقوامی تجارت پر اثر انداز ہو سکتی ہے۔
امریکا اس سے قبل بھی ایران کو خبردار کر چکا ہے کہ بین الاقوامی جہاز رانی میں رکاوٹ یا حملوں کی صورت میں سخت فوجی اور سفارتی ردعمل دیا جائے گا۔
