پاکستان نے یمن کے حوثی گروپ کی جانب سے سعودی عرب اور بحیرۂ احمر میں بین الاقوامی جہاز رانی کے خلاف دی گئی دھمکیوں کی سخت مذمت کرتے ہوئے سعودی عرب کی سلامتی، خودمختاری اور علاقائی سالمیت کے لیے اپنی غیر متزلزل حمایت کا اعادہ کیا ہے۔
دفتر خارجہ کے ترجمان کی جانب سے جاری بیان میں کہا گیا ہے کہ سعودی عرب اور تجارتی بحری جہازوں کو دھمکیاں دینا ناقابلِ قبول ہے اور اس طرح کے اقدامات خطے کے امن، عالمی تجارت اور بین الاقوامی بحری سلامتی کے لیے خطرہ ہیں۔
ترجمان نے واضح کیا کہ اگر پاکستانی پرچم بردار بحری جہازوں کو کسی بھی قسم کا خطرہ لاحق ہوا تو اسے پاکستان کی قومی سلامتی کے خلاف اقدام تصور کیا جائے گا۔ انہوں نے کہا کہ پاکستان اپنے بحری مفادات، تجارتی راستوں اور قومی سلامتی کے تحفظ کے لیے ہر ضروری اور بین الاقوامی قانون کے مطابق اقدام اٹھانے کا حق محفوظ رکھتا ہے۔
دفتر خارجہ نے بحیرۂ احمر میں محفوظ جہاز رانی اور عالمی تجارتی سرگرمیوں کے بلا تعطل جاری رہنے کی اہمیت پر زور دیتے ہوئے کہا کہ بین الاقوامی بحری راستوں کا تحفظ عالمی معیشت کے استحکام کے لیے ناگزیر ہے۔
پاکستان نے تمام متعلقہ فریقوں پر زور دیا کہ وہ بین الاقوامی قانون اور اقوام متحدہ کے چارٹر کا احترام کریں، تحمل کا مظاہرہ کریں اور خطے میں کشیدگی کم کرنے کے لیے سفارتی ذرائع اختیار کریں تاکہ مزید تنازع سے بچا جا سکے۔
