اسلام آباد: نائب وزیراعظم و وزیر خارجہ اسحاق ڈار نے وزارتِ خارجہ میں ایک اعلیٰ سطحی اجلاس کی صدارت کرتے ہوئے پاکستان کی آئندہ سفارتی مصروفیات، خارجہ پالیسی کی ترجیحات اور بین الاقوامی سطح پر ہونے والی سرگرمیوں کی تیاریوں کا تفصیلی جائزہ لیا۔
اجلاس میں سیکریٹری خارجہ آمنہ بلوچ سمیت وزارتِ خارجہ کے سینئر افسران نے شرکت کی، جہاں آئندہ اہم سفارتی سرگرمیوں، بین الوزارتی رابطہ کاری اور قومی مفادات کے مؤثر فروغ سے متعلق مختلف امور پر غور کیا گیا۔
اجلاس کے دوران اسحاق ڈار نے قومی ترجیحات کو عالمی سطح پر مؤثر انداز میں اجاگر کرنے اور متعلقہ اداروں کے درمیان مضبوط ہم آہنگی کو یقینی بنانے پر زور دیا۔
انہوں نے وزارتِ خارجہ کو ہدایت کی کہ تمام متعلقہ اداروں کے ساتھ قریبی رابطہ رکھا جائے اور آئندہ سفارتی سرگرمیوں کے لیے جامع منصوبہ بندی اور مکمل تیاری کو یقینی بنایا جائے تاکہ پاکستان کے قومی مفادات کا ہر سطح پر مؤثر تحفظ اور فروغ ممکن بنایا جا سکے۔
وزیر خارجہ نے کہا کہ بدلتے ہوئے علاقائی اور عالمی حالات کے تناظر میں پاکستان کی سفارتی حکمت عملی کو مزید فعال، مربوط اور مؤثر بنانے کی ضرورت ہے، جبکہ وزارتِ خارجہ کو تمام آئندہ بین الاقوامی مصروفیات کے لیے مکمل طور پر تیار رہنا چاہیے۔
