اسلام آباد: ایران کے وزیر داخلہ سکندر مومنی صدر مسعود پزشکیان کا خصوصی پیغام لے کر اعلیٰ سطحی وفد کے ہمراہ پاکستان پہنچ گئے ہیں، جہاں ان کے دورے کے دوران دوطرفہ تعلقات، سرحدی تعاون، تجارت اور خطے کی مجموعی صورتحال پر اہم مذاکرات متوقع ہیں۔
اسلام آباد ایئرپورٹ پر وفاقی وزیر داخلہ محسن نقوی نے ایرانی ہم منصب کا پرتپاک استقبال کیا۔ اس موقع پر پاکستان میں ایران کے سفیر رضا امیری مقدم اور وزیر مملکت برائے داخلہ طلال چودھری بھی موجود تھے، جنہوں نے معزز مہمان کو گلدستہ پیش کیا۔
استقبال کے موقع پر محسن نقوی نے کہا کہ پاکستان، ایرانی وزیر داخلہ کو خوش آمدید کہتا ہے اور امید ہے کہ ان کا یہ دورہ دونوں برادر ممالک کے تعلقات کو مزید مضبوط بنانے میں اہم کردار ادا کرے گا۔ انہوں نے کہا کہ انہیں توقع ہے کہ ایرانی وزیر داخلہ اپنے ساتھ مثبت پیش رفت اور خوشخبری بھی لائے ہیں، جبکہ علاقائی صورتحال پر بھی نتیجہ خیز بات چیت ہوگی۔
ایرانی وزیر داخلہ کے ہمراہ آنے والے وفد میں گورنر سیستان و بلوچستان، نائب وزیر داخلہ، نائب وزیر برائے شہری ترقی و ٹرانسپورٹ، نیشنل ایرانی آئل کمپنی کے سربراہ، وزیر زراعت کے خصوصی نمائندے سمیت متعدد اعلیٰ حکام شامل ہیں۔
دورے کے دوران ایرانی وزیر داخلہ وزیراعظم محمد شہباز شریف اور فیلڈ مارشل سید عاصم منیر سے بھی ملاقات کریں گے، جن میں پاک ایران تعلقات، سرحدی سلامتی، اقتصادی تعاون، توانائی، تجارتی روابط اور خطے کی موجودہ صورتحال پر تبادلہ خیال کیا جائے گا۔
بعد ازاں وفاقی وزیر داخلہ محسن نقوی سے ملاقات میں ایرانی وزیر داخلہ سکندر مومنی نے کہا کہ اپنے بھائی محسن نقوی سے دوبارہ ملاقات کر کے خوشی ہوئی ہے۔ انہوں نے کہا کہ پاکستان اور ایران کے تعلقات مثالی نوعیت کے ہیں اور وہ پاکستانی حکومت اور عوام کی گرمجوش مہمان نوازی کے ہمیشہ معترف رہے ہیں۔
محسن نقوی نے اس موقع پر کہا کہ انہیں یقین ہے کہ ایرانی وزیر داخلہ کا یہ دورہ دونوں ممالک کے درمیان مختلف شعبوں میں تعاون کو مزید وسعت دینے میں مددگار ثابت ہوگا اور مشترکہ مفادات کے امور پر اہم پیش رفت سامنے آئے گی۔
