تہران: ایرانی وزیر خارجہ عباس عراقچی نے کہا ہے کہ امریکا کے ساتھ جاری جنگ اس وقت ختم ہوگی جب ایران میدانِ جنگ میں برتری حاصل کرے یا پھر مذاکرات کے ذریعے کوئی قابل قبول حل سامنے آئے۔
ایرانی خبر رساں ایجنسی کو دیے گئے انٹرویو میں عباس عراقچی نے کہا کہ مذاکرات کا بہترین وقت وہ ہوتا ہے جب کسی ملک نے عسکری محاذ پر ٹھوس میدانی اور اسٹریٹجک کامیابیاں حاصل کر لی ہوں۔
انہوں نے کہا کہ عوام کی زندگیوں اور ملک کے مستقبل سے متعلق فیصلے انتہائی ذمہ داری کے ساتھ کیے جانے چاہئیں اور ایسے معاملات میں خطرات مول لینے کے بجائے مکمل حساب کتاب اور درست حکمت عملی اختیار کرنا ضروری ہے۔
ایرانی وزیر خارجہ کے مطابق سیاسی قیادت کو ہر مرحلے پر یہ جائزہ لینا چاہیے کہ جنگ جاری رکھنے سے کیا فوائد حاصل ہوں گے اور اس کی قیمت کتنی بھاری پڑ سکتی ہے۔
عباس عراقچی نے مزید کہا کہ اگرچہ جنگ کے دوران ایران کو بعض نقصانات کا سامنا کرنا پڑا، تاہم ان کے بقول ایران ایک "مؤثر بین الاقوامی طاقت” کے طور پر ابھرا ہے اور اس نے بحران کے دوران اپنے ریاستی نظام کی مضبوطی اور استحکام کا مظاہرہ کیا۔
