امریکا نے ایران کے خلاف اپنی فوجی کارروائیوں کا سلسلہ جاری رکھتے ہوئے مسلسل ساتویں شب بھی مختلف مقامات پر حملے کیے، جبکہ ایرانی شہر سیرک میں متعدد دھماکوں کی آوازیں سنے جانے کی اطلاعات سامنے آئی ہیں۔
امریکی فوج کی جانب سے جاری بیان میں دعویٰ کیا گیا ہے کہ ایران کی بندرگاہوں کے گرد نافذ ناکہ بندی کے دوران گزشتہ تین دنوں میں چار تجارتی جہازوں کا رخ تبدیل کرایا گیا، جبکہ ایک تجارتی جہاز کو ناکارہ بنا دیا گیا۔
بیان میں کہا گیا کہ بحری کارروائیوں کا مقصد خطے میں امریکی مفادات کے تحفظ اور بحری نقل و حمل پر نگرانی کو یقینی بنانا ہے۔ تاہم امریکی فوج نے ناکارہ بنائے جانے والے جہاز کی مزید تفصیلات یا اس کی قومی شناخت ظاہر نہیں کی۔
دوسری جانب ایرانی ذرائع ابلاغ کے مطابق جنوبی ایران کے ساحلی شہر سیرک میں زور دار دھماکوں کی آوازیں سنی گئیں، تاہم فوری طور پر دھماکوں کی نوعیت، ممکنہ نقصانات یا ہلاکتوں کے بارے میں سرکاری سطح پر کوئی تفصیلی بیان جاری نہیں کیا گیا۔
حالیہ پیش رفت ایسے وقت میں سامنے آئی ہے جب ایران اور امریکا کے درمیان کشیدگی میں مسلسل اضافہ دیکھا جا رہا ہے، جبکہ خلیج اور آبنائے ہرمز میں فوجی سرگرمیوں کے باعث عالمی سطح پر توانائی کی ترسیل اور بحری تجارت سے متعلق خدشات بھی بڑھ گئے ہیں۔
