تہران: ایران کے سرکاری میڈیا نے اسلامی انقلابی گارڈ کور (پاسدارانِ انقلاب) کے حوالے سے دعویٰ کیا ہے کہ آبنائے ہرمز کے جنوبی علاقے میں دو آئل ٹینکر بارودی سرنگوں والے راستے سے گزرنے کے بعد دھماکوں کا شکار ہو گئے، جس کے نتیجے میں دونوں جہازوں میں آگ بھڑک اٹھی۔
سرکاری ٹیلی ویژن کے مطابق پاسدارانِ انقلاب کے بیان میں کہا گیا ہے کہ یہ واقعہ آبنائے ہرمز کے قریب پیش آیا، جہاں دونوں آئل ٹینکر مبینہ طور پر کان کنی (Minefield) والے راستے سے گزرے، جس کے بعد زور دار دھماکے ہوئے اور جہازوں میں آگ لگ گئی۔
بیان میں دھماکوں کی نوعیت، جانی نقصان یا متاثرہ جہازوں کی ملکیت سے متعلق مزید تفصیلات فراہم نہیں کی گئیں، جبکہ واقعے کی آزاد ذرائع سے فوری طور پر تصدیق بھی نہیں ہو سکی۔
آبنائے ہرمز دنیا کی اہم ترین بحری گزرگاہوں میں شمار ہوتی ہے، جہاں سے عالمی سطح پر تیل کی بڑی مقدار کی ترسیل ہوتی ہے۔ اس علاقے میں کسی بھی قسم کا سیکیورٹی واقعہ عالمی توانائی کی منڈیوں اور بین الاقوامی بحری تجارت پر اثرات مرتب کر سکتا ہے۔
حالیہ دنوں میں خطے میں بڑھتی ہوئی کشیدگی کے باعث آبنائے ہرمز اور خلیجی پانیوں میں سلامتی کی صورتحال پر عالمی سطح پر گہری نظر رکھی جا رہی ہے۔
