اسلام آباد: پاکستان اور سوئیڈن نے زرعی شعبے میں دوطرفہ تعاون کو مزید وسعت دینے، تحقیق اور فوڈ سکیورٹی کے فروغ کے ساتھ ساتھ اینٹی مائیکروبیل ریزسٹنس (AMR) کے خلاف مشترکہ اقدامات کو مضبوط بنانے پر اتفاق کیا ہے۔
یہ اتفاق رائے وفاقی وزیر برائے انڈسٹری اینڈ پروڈکشن رانا تنویر حسین اور پاکستان میں سوئیڈن کی سفیر الیگزینڈرا برگ کے درمیان ہونے والی ملاقات میں سامنے آیا، جس میں باہمی تعلقات، زرعی ترقی اور جدید ٹیکنالوجی کے شعبوں میں تعاون پر تفصیلی تبادلہ خیال کیا گیا۔
ملاقات کے دوران سوئیڈن نے اینٹی مائیکروبیل ریزسٹنس کے خلاف عالمی سطح پر پاکستان کے کردار کی حمایت کا اعادہ کیا، جبکہ دونوں ممالک نے زرعی تحقیق، فوڈ سیفٹی اور جدید زرعی نظام کے فروغ کے لیے تعاون بڑھانے پر اتفاق کیا۔
وفاقی وزیر رانا تنویر حسین نے کہا کہ پاکستان اینٹی مائیکروبیل ریزسٹنس کے خلاف عالمی کوششوں میں فعال کردار ادا کرتا رہے گا اور اس مقصد کے لیے “ون ہیلتھ اپروچ” ناگزیر ہے، جس کے ذریعے انسانی صحت، حیوانی صحت اور ماحولیاتی تحفظ کو یکجا کر کے مؤثر حکمت عملی اختیار کی جا سکتی ہے۔
انہوں نے کہا کہ پاکستان زرعی شعبے میں سوئیڈن کے تجربات اور جدید ٹیکنالوجی سے بھرپور استفادہ کرنا چاہتا ہے اور سوئیڈش کمپنیوں کو پاکستان کے زرعی شعبے میں سرمایہ کاری کی دعوت دی گئی ہے۔
رانا تنویر حسین کا کہنا تھا کہ پاکستان فوڈ سیفٹی، زرعی جدت اور پائیدار زرعی نظام کے فروغ کے لیے پرعزم ہے، جبکہ دونوں ممالک کے درمیان تحقیق، سرمایہ کاری اور جدید ٹیکنالوجی پر مبنی تعاون مستقبل میں مزید مضبوط ہوگا۔
ملاقات میں اس عزم کا بھی اظہار کیا گیا کہ پاکستان اور سوئیڈن زرعی ترقی، فوڈ سکیورٹی اور اینٹی مائیکروبیل ریزسٹنس جیسے عالمی چیلنجز سے نمٹنے کے لیے مشترکہ کوششیں جاری رکھیں گے۔
