روسی وزیر خارجہ سرگئی لاروف نے کہا ہے کہ روس، چین، پاکستان اور مصر کے تعاون سے ایران اور عرب ممالک کے درمیان مذاکرات اورسفارتی رابطوں کو فروغ دینے کی کوششیں جاری رکھے ہوئے ہے تاکہ خطے میں بڑھتی ہوئی کشیدگی کو کم کیا جا سکے۔
سرگئی لاروف کے مطابق ماسکو کی خواہش ہے کہ ایران، اردن، عراق اور عرب لیگ کو ایک مشترکہ مذاکراتی پلیٹ فارم پر لایا جائے، جہاں علاقائی سلامتی، باہمی اعتماد اور تنازعات کے پرامن حل پر بات چیت ہو سکے۔
انہوں نے بتایا کہ ایران نے بھی مجوزہ مذاکراتی عمل میں شرکت پر آمادگی ظاہر کی ہے، جسے خطے میں سفارتی پیش رفت کے لیے ایک مثبت اشارہ قرار دیا جا رہا ہے۔
روسی وزیر خارجہ کا کہنا تھا کہ روس خطے میں کشیدگی کم کرنے اور سیاسی حل تلاش کرنے کے لیے مختلف شراکت دار ممالک کے ساتھ رابطے میں ہے، جبکہ بعض قوتیں ایسی بھی ہیں جو ایران اور عرب ممالک کے درمیان بہتر تعلقات اور امن کی خواہاں نہیں ہیں۔
لاروف نے زور دیا کہ مشرق وسطیٰ میں پائیدار استحکام کے لیے تمام متعلقہ فریقوں کے درمیان براہ راست مکالمہ ناگزیر ہے، اور روس اس مقصد کے لیے اپنی سفارتی کوششیں جاری رکھے گا۔
